do damon se hai faqat gor-e-ghariban aabaad
tum hamesha raho ai hasrat-o-arman aabaad

tujh se ai dard hai qasr-e-dil-e-viran aabaad
kiya sar-afraaz kiya khana-viran aabaad

jis jagah baith ke roe wo makan dub gae
shahar hone nahin dete tere giryan aabaad

qais-o-farhad ke dam se bhi ajab raunaq thi
kuchh dinon khub rahe koh-o-bayaban aabaad

wahshat-e-dil ye badhi chhod diye ghar sab ne
tum hue khana-nashin ho gain galiyan aabaad

aamad-e-qafila-e-dard-o-alam hai sad-shukr
aaj hoti hai sara-e-dil-e-viran aabaad

mit gae dagh-e-jigar husn-e-rukh-e-yar gaya
kal ki hai baat ki tha kya ye gulistan aabaad

tere diwanon ke jis dasht se utthe bistar
wahshiyon se na hua phir wo bayaban aabaad

surat-e-shama hua khak-e-badan jal jal kar
hum ne turbat bhi na ki ai shab-e-hijran aabaad

sohbaten ho gain barbaad gul-andamon ki
khak udti hai wahan the jo gulistan aabaad

sina o dil mein khushi se na jagah thi gham ki
ai 'tashshuq' ye makan bhi the kabhi han aabaad