duniya mein jo samajhte the bar-e-giran mujhe
wo hi suna rahe hain meri dastan mujhe

mud mud ke dekhta tha tere naqsh-e-pa ko main
tanha samajh ke chal diya jab karwan mujhe

do gam mere sath chale rah-e-ishq mein
milta nahin hai aisa koi raaz-dan mujhe

khamoshiyon se rabta qaem jo kar liya
duniya samajh rahi hai abhi be-zaban mujhe

main ne 'rais' khidmat-e-sher-o-sukhan jo ki
is waste aziz hai urdu zaban mujhe