duniya se har rishta toda khud se ru-gardani ki
sirf tumhaara dhyan rakha aur jine mein aasani ki

majnun aur farhad hue jab ishq mein sab barbaad hue
tab jangal ne kuch kiya sahra ne naql-e-makani ki

us ki mohni surat jaise phulon ka aameza hai
aur us ki aawaz hai goya re-ga-ma-pa-dhani ki

bhuli-bisri yaad ne jab daryaft kiya ahwal mera
dil ne zakhm kalam kiya aankhon ne ashk-bayani ki

ilm ka dam bharna chhodo bhi aur amal ko bhul bhi jao
aaina-khane mein ho sahib fikr karo hairani ki