ek bhayanak tirgi hai raushni ai raushni

ek bhayanak tirgi hai raushni ai raushni
sham-e-jaan bujhne lagi hai raushni ai raushni
kya koi bhatka hua jugnu idhar bhi aaega
raat gahri ho chali hai raushni ai raushni
aasmanon par sitare hain na sinon mein sharar
ye qayamat ki ghadi hai raushni ai raushni
khatm kab hoga ye ehsas-e-ziyan ka rat-jaga
ek ek lamha sadi hai raushni ai raushni
hum andheron ke hawari ban ke zinda hain magar
zindagi sharmindagi hai raushni ai raushni
apni qismat mein hai nok-e-khar ya shakh-e-bahaar
phul hain ya phuljhadi hai raushni ai raushni