ek pauda jo uga hai use pani dena
apne aangan ko nai rut ki kahani dena

teri aawaz se jab tute mere ghar ka sukut
dar-o-diwar ko bhi sehr-bayani dena

ponchh lena meri palkon se lahu ki bunden
meri aankhon ko agar manzar-e-sani dena

kashtiyan dena magar izn-e-safar se pahle
thahre pani ko bhi dariya ki rawani dena

yun jalun main ki na sharminda rahun suraj se
aur kuchh aur mujhe sokhta-jaani dena

ret par naqsh-e-kaf-e-pa nahin rahne pate
ahl-e-sahra ko koi aur nishani dena