fasle ke mani ka kyun fareb khate ho
jitne dur jate ho utne pas aate ho

raat tut padti hai jab sukut-e-zindan par
tum mere khayalon mein chhup ke gungunate ho

meri khalwat-e-gham ke aahani darichon par
apni muskurahat ki mishalen jalate ho

jab tani salakhon se jhankti hai tanhai
dil ki tarah pahlu se lag ke baith jate ho

tum mere iradon ke dolte sitaron ko
yas ke khalaon mein rasta dikhate ho

kitne yaad aate ho puchhte ho kyun mujh se
jitna yaad karte ho utne yaad aate ho