gai nahin tere zulm-o-sitam ki KHu ab tak

gai nahin tere zulm-o-sitam ki khu ab tak
tapak raha hai meri aankh se lahu ab tak
na jaane kab se hai mere labon pe tera nam
isi sabab se to tuta nahin wuzu ab tak
tamam umr gulistan mein kat gai lekin
hua nahin mujhe aur ek rang-o-bu ab tak
kisi bhi sher ko hasil hui na zarkhezi
main dhundhta raha sahraon mein numu ab tak
khuli sarae ke jaisa hai ye badan apna
aur is sarae mein chalti rahi hai lu ab tak
tasawwuraat ke khemon ko raushni mil jae
isi khayal ki hai dil mein aarzu ab tak
kiye the 'shauq' jo mere jawan bete ne
wo dil ke chaak hue hi nahin rafu ab tak
Please share if you liked this!!!