git mere hain magar nur-e-sukhan us ka hai
haq to ye hai ki mera jauhar-e-fan us ka hai

phul to phul hain kanton ki rawish bhi us ki
baghban kuchh bhi kahe rang-e-chaman us ka hai

sabz mausam ki mere dar pe jo dastak jagi
main ne jaana ki yahi tarz-e-sukhan us ka hai

mauj-e-gul baad-e-saba rang-e-chaman aab-e-rawan
sare aalam mein agar hai to chalan us ka hai

us ki pahchan faqat koh-o-samundar se nahin
zarra-e-khak bhi khurshid-e-watan us ka hai

is se kya farq pade tarz-e-nawa-sanji par
hamd us ki hai labon par ki bhajan us ka hai

main yam-e-waqt mein bahta hua tinka 'nami'
ye zamin us ki tamasha-e-zaman us ka hai