gul-badan khak-nashinon se pare hat jaen
aasman ujli zaminon se pare hat jaen

main bhi dekhun to sahi biphre samundar ka mizaj
ab ye mallah safinon se pare hat jaen

karne wala hun dilon par main mohabbat ka nuzul
sare bu-jahl madinon se pare hat jaen

main khalaon ke safar par hun nikalne wala
chand suraj mere zinon se pare hat jaen

ab to hum zahiri sajde bhi tere chhod chuke
ab to ye dagh jabinon se pare hat jaen