gulab-chehre pe shab ka eajaz bolta hai
wo chup hai lekin nazar ka andaz bolta hai

main jaise khushbu ki barishon main naha raha hun
hawa ke honton se koi gul-baz bolta hai

mujhi mein raushan charagh-e-naghma magar abhi tak
mujhe guman hai ki parda-e-saz bolta hai

pukarti hai koi sada mujh ko dasht-e-jaan se
ye tu hai ya mera wahm-e-awaz bolta hai

parind har chand qaid to ho gaya hai lekin
har ek bun-e-mu se josh-e-parwaz bolta hai