hai mohabbat sab ko uske abru-e-KHamdar ki

hai mohabbat sab ko us ke abru-e-khamdar ki
hind mein kya aabru baqi rahi talwar ki
wasl ki shab chandni diwar se jaane na pae
minnaten karta hun har khar-e-sar-e-diwar ki
ustura phirne se ru-e-yar par hai daur-e-khat
chaal us kam-bakht ne sikhi hai kya parkar ki
nashsha-e-mai ka guman karne laga wo bad-guman
dekh kar surkhi hamare dida-e-khun-bar ki
ghar bhi mera muntazir hai yar ka meri tarah
rauzan-e-dar mein hai surat dida-e-bedar ki
kahte ho hum khwab mein aate jo tu sota kabhi
khub ki barbaad mehnat dida-e-bedar ki
bagh-e-alam mein kahan hai koi mujh sa rahm-dil
roz karta hun ayaadat nargis-e-bimar ki
dagh-e-sar hain josh-e-sauda mein ba-rang-e-gul mujhe
misl-e-gulbun panw mein kab hai shikayat khar ki
wo khuda ka dost hai aur dost hai us ka khuda
kyun na ho 'nasikh' mohabbat haidar-e-karrar ki
This is a great hindi shayari english. Please share if you liked this!!!