hangama-e-gham se tang aa kar izhaar-e-masarrat kar baiThe

hangama-e-gham se tang aa kar izhaar-e-masarrat kar baithe
mashhur thi apni zinda-dili danista shararat kar baithe
koshish to bahut ki hum ne magar paya na gham-e-hasti se mafar
virani-e-dil jab had se badhi ghabra ke mohabbat kar baithe
hasti ke talatum mein pinhan the aish o tarab ke dhaare bhi
afsos hami se bhul hui ashkon pe qanaat kar baithe
zindan-e-jahan se ye nafrat ai hazrat-e-waiz kya kahna
allah ke aage bas na chala bandon se baghawat kar baithe
gulchin ne to koshish kar dali suni ho chaman ki har dali
kanton ne mubarak kaam kiya phulon ki hifazat kar baithe
allah to sab ki sunta hai jurat hai 'shakil' apni apni
'haali' ne zaban se uf bhi na ki 'iqbaal' shikayat kar baithe
Please share if you liked this!!!