hasil-e-intizar kuchh bhi nahin
yani anjam-kar kuchh bhi nahin

hasrat-e-wasl ke muqabil mein
kulfat-e-intizar kuchh bhi nahin

dasht mein kuchh nahin sarab to hai
bagh mein gul na khar kuchh bhi nahin

kis se apni shanakht lete ho
aaina juz ghubar kuchh bhi nahin

dil mein jhanko mere agar to khule
daman-e-tar tar kuchh bhi nahin

kaun hum se mile ki pas apne
juz dil-e-daghdar kuchh bhi nahin

aa nafas do nafas ko mil baithen
sans ka e'tibar kuchh bhi nahin