jate ho tum jo ruth ke jate hain ji se hum
tum kya khafa ho khud hain khafa zindagi se hum

kuchh aise bad-hawas hain dil ki lagi se hum
kahte hain muddaa-e-dil muddai se hum

be-zar ho chuke hain bahut dil-lagi se hum
bas ho to umr bhar na milen ab kisi se hum

ye jaante to shikwe na karte raqib ke
kahte hain teri zid se milenge usi se hum

mujrim hai kaun donon mein insaf kijiye
chhup chhup ke aap milte hain ya muddai se hum

hum aur chah ghair ki allah se daro
milte hain tum se bhi to tumhaari khushi se hum