jo apne ghar ko kaba mante hain
pas-e-diwar phir kyun jhankte hain

nahin tere junun par shak nahin hai
teri aadat magar pahchante hain

ye aazurda-jabin mazi ke basi
nae zakhmon pe yaaden bandhte hain

tere ahl-e-yaqin sajdon mein jhuk kar
mere kafir tera gham mangte hain

rida-e-shab to abr-e-tar se bhigi
chalo ek dhyan sar par tante hain

sitare zabt ke moti hazar ke
qaba-e-arzu par tankte hain

teri khoti hansi par rone wale
teri aankhon ke mausam jaante hain