jo dam mein dam hai to saqi ki justuju hi sahi
nahin sharab to sauda-e-arzu hi sahi

jo bandhna hai tasawwur hi apni aankhon mein
to phir piyala-o-saghar hi kyun subu hi sahi

salat-e-shara nahin jis ka ehtimam karen
namaz-e-ishq hai ai dil to be-wuzu hi sahi

junun mein chaak hai daman to fikr-e-sozan kya
jo ban gaya hai gareban to be-rafu hi sahi

jo hai sharab harifan-e-baada-paima ko
hamare waste mauzu-e-guftugu hi sahi

agar khayal mein khwabon ki gunj baqi hai
to aankh khulte hi ghogha-e-ha-o-hu hi sahi

fasana apne junun ka zaban zaban pe hai aaj
nahin jo sahra-ba-sahra to ku-ba-ku hi sahi

jafa-e-naz agar hai babang-e-tabl-o-duhal
to dil-dukhon ka gila surma-dar-gulu hi sahi