kahte ho ab mere mazlum pe bedad na ho
sitam-ijad ho phir kyun sitam ijad na ho

nahin paiman-e-wafa tum ne nahin bandha tha
wo fasana hi ghalat hai jo tumhein yaad na ho

tum ne dil ko mere kuchh aisa kiya hai nashad
shad karna bhi jo ab chaho to ye shad na ho

jo giraftar tumhaara hai wahi hai aazad
jis ko aazad karo tum kabhi aazad na ho

mera maqsad ki wo khush hon meri khamoshi se
un ko andesha ki ye bhi koi fariyaad na ho

main na bhulun gham-e-ishq ka ehsan 'wahshat'
un ko paiman-e-mohabbat jo nahin yaad na ho