kya yahan dekhiye kya wahan dekhiye
aap hi aap hain ab jahan dekhiye

ghar jala dekhiye wo dhuan dekhiye
aag pahunchi kahan se kahan dekhiye

dekhiye ta-kamar zulf ka shoabada
uljhanen ban gain dastan dekhiye

mujh ko malum hai aap masum hain
jal gaya hoga yun hi makan dekhiye

bujh gai shama parwane rukhsat hue
lut gaya shauq ka karwan dekhiye

ishq roz-e-azal se mata-e-yaqin
husn hai aaj bhi bad-guman dekhiye

aaiye mere dil mein bhi waqt-e-ghazal
ek dariya-e-atish rawan dekhiye

husn ki ehtiyat-e-hasin dekh kar
ishq ka iltihab-garan dekhiye

is tamashe ka jab aap ko shauq hai
hum jalate hain apna makan dekhiye

ismat-e-dil hai aur gham ka aatish-kada
aag ban jaegi gulistan dekhiye

ishtiyaq-e-jabin apna dekhenge hum
aap virani-e-astan dekhiye

aap ke samne aur tab-e-sukhan
khush-bayan kitne hain be-zaban dekhiye

tur hi ki tarah jal na jae kahin
jalwa-bari se pahle makan dekhiye

ramz-o-ima ghazal ki agar jaan hain
aap 'tarzi' ka husn-e-bayan dekhiye