lahu aankhon mein raushan hai ye manzar dekhna ab ke dayar-e-gham mein kya guzri hai hum par dekhna ab ke andhera hai wahi lekin riwayat wo nahin baqi charaghon ki jagah hathon mein khanjar dekhna ab ke sulagte ghar ki chingari bhi badla lene wali hai ye manzar dekhna lekin sambhal kar dekhna ab ke shikast-o-fath ki tarikh likkhi jaegi yun bhi tahi-dasti se hoga marka sar dekhna ab ke shanasai ke sae badh gae sahn-e-rifaqat mein hamari pusht mein paiwast khanjar dekhna ab ke zamin ko phir lahu bakhsha gaya hai be-gunahon ka sitam ke har shajar ko phir samar-war dekhna ab ke sukut-e-shab mein aankhen band hongi jab darichon ki koi saya nazar aaega dar dar dekhna ab ke chhalakne wali hai ye chashm-e-viran ek din 'rahi' sulagte dasht mein koi samundar dekhna ab ke