lutf rahega ham-nashin zahid ba-wazu bhi hai
aaj ghata ke dosh par saz bhi hai subu bhi hai

pesh-e-nigah-e-muztarib hasil-e-justuju bhi hai
yani wo shokh mail-e-pursish-e-arzu bhi hai

itr-fashan shamim-e-gul baad-e-saba latif-tar
taza-kun masham-e-jaan gesu-e-mushk-bu bhi hai

chang ba-dast nai-ba-lab mutrib-e-dil-nawaz bhi
garm-nawa chaman chaman tair-e-khush-gulu bhi hai

tujh pe ye raaz munkashif zahid-e-khuld-ju kahan
hasil-e-jannat-nazir aalam-e-rang-o-bu bhi hai