partaw-e-husn ek hai aur aaina-khane bahut
ek haqiqat ne bana dale hain afsane bahut

rukhsat ai chaak-e-gareban dast-e-wahshat alwidaa
badh chuke hain ab junun ki had se diwane bahut

kho na jaen kasrat-e-asnam mein wahdat-parast
bandagi ke zehn mein hote hain but-khane bahut

sham-e-turbat par meri aate hue jalte hain par
sham-e-mahfil par to aa jate the parwane bahut

'bismil' is dilli ke in sunsan viranon mein aah
gunjte hain aaj bhi ibrat ke afsane bahut