phir usi rahguzar par shayad
hum kabhi mil saken magar shayad
jin ke hum muntazir rahe un ko
mil gae aur ham-safar shayad
jaan pahchan se bhi kya hoga
phir bhi ai dost ghaur kar shayad
ajnabiyat ki dhund chhat jae
chamak uthe teri nazar shayad
zindagi bhar lahu rulaegi
yaad-e-yaran-e-be-khabar shayad
jo bhi bichhde wo kab mile hain 'faraaz'
phir bhi tu intizar kar shayad