raste mein jitne peD mile be-sada mile

raste mein jitne ped mile be-sada mile
ghar se nikal pade the ki taza hawa mile
insan ki talash hai rabb-e-karim ko
insan ki aarzu hai kahin par khuda mile
jo shakhs lamha lamha tajassus ke bawajud
khud se na mil saka ho zamane se kya mile
ye zindagi kuchh aise mere hath aa gai
jaise kisi faqir ko sikka pada mile
dharti ne aansuon ko pukara hai dosto
baadal tamam ab ke samundar se ja mile
har bar usi se ek naya ishq kijiye
jab bhi mile wo shakhs to badla hua mile