roz jo marta hai is ko aadmi likkho kabhi
tirgi ke bab mein bhi raushni likkho kabhi

sans lena bhi muqaddar mein nahin jis ahd mein
baith kar us ahd ki bhi an-kahi likkho kabhi

dard-e-dil dard-e-jigar ki dastan likkhi bahut
nan-e-khushk-o-ab-e-kam ko zindagi likkho kabhi

maslahat par bhi kabhi hote rahe qurban usul
in usulon ko bhi un ki dil-lagi likkho kabhi

gar samete ja rahe ho kaam jo karne ke the
us ko 'rahat' saaton ki aagahi likkho kabhi