sab thakan aankh mein simat jae
nind aa jae raat kat jae

ru-ba-ru hon to guftugu bhi karen
kaun aawaz se lipat jae

wahm ye hai ki band darwaza
dekh kar hi na wo palat jae

sikh dariya se koh-paimai
koi kyun raste se hat jae

kaun marega dusra patthar
koi surat ki dard bat jae

main hawa hun ki chal raha hun hanuz
arsa-e-dahr hi na kat jae

be-dili khilat-e-nadamat hai
ek bala hai agar chimat jae

apne chehre ko dhanp dhanp ke rakh
aaina gard se na at jae