shane ka bahut khun-e-jigar jae hai pyare
tab zulf kahin ta-ba-kamar jae hai pyare

jis din koi gham mujh pe guzar jae hai pyare
chehra tera us roz nikhar jae hai pyare

ek ghar bhi salamat nahin ab shahr-e-wafa mein
tu aag lagane ko kidhar jae hai pyare

rahne de jafaon ki kadi dhup mein mujh ko
sae mein to har shakhs thahar jae hai pyare

wo baat zara si jise kahte hain gham-e-dil
samjhane mein ek umr guzar jae hai pyare

har-chand koi nam nahin meri ghazal mein
teri hi taraf sab ki nazar jae pyare