tum ko nahin hai yaad abhi kal ki baat hai
baham tha ittihad abhi kal ki baat hai

manzil thi ek jis pe baham gamzan rahe
bilkul na tha tazad abhi kal ki baat hai

ek raushni thi dil mein bahut pak-o-saf the
aisa na tha inad abhi kal ki baat hai

buniyaad khud hi aap ne rakkhi nifaq ki
shir-o-shakar the shad abhi kal ki baat hai

sehn-e-chaman mein apne 'nazar' thi ajab bahaar
tha daur-e-abr-o-baad abhi kal ki baat hai