tut kar rah gaya aaine se rishta apna
ek muddat hui dekhna nahin chehra apna

koi tufan hai na ab koi talatum dil mein
sahil-e-dard pe thahra hai safina apna

lafz-o-mani ke nae phul ubhar aaenge
naqsh ho jae jo qirtas pe lahja apna

yaad khushbu hai chhupane se kahan chhupti hai
mauj-e-gul khud hi bana leti hai rasta apna

jis ke jaane se munawwar hue palkon pe charagh
aaj tak us ne dikhaya nahin chehra apna

raat ke sath 'asar' laut ke ghar jata hai
rasta dekh raha hoga daricha apna