waqt ghamnak sawalon mein na barbaad karen
kuchh na kuchh sai-e-ilaj-e-dil-e-nashad karen

ishq ko husn ke atwar se kya nisbat hai
wo hamein bhul gae hum to unhen yaad karen

bastiyan kar chuke viran tere diwane
ab ye lazim hai kharaba koi aabaad karen

tah mein go hikmat-e-parwez hai raqsan lekin
kaam har ek ba-nam-e-gham-e-farhad karen

hujjat-o-illat-e-malul hai yaron mein 'sahar'
be-sabab shai ka bhi koi sabab ijad karen