wo iztirab shab-e-intizar hota hai
ki mahtab kaleje ke par hota hai

fasurda aap na hon dekh kar mera daman
ye bad-nasib yunhi tar tar hota hai

nahin kuchh aur mohabbat ki chot hai hamdam
ye dard dil mein kahin bar bar hota hai

teri talash se ghafil nahin tera wahshi
zawal-e-hosh mein bhi hoshiyar hota hai

ho un ka wada-e-farda ghalat sahi lekin
main kya karun ki mujhe eatibar hota hai