ye mohabbat ka fasana bhi badal jaega
waqt ke sath zamana bhi badal jaega

aaj-kal mein koi tufan hai uthne wala
hum gharibon ka thikana bhi badal jaega

mujh se lillah na sarkar chhudaen daman
aap badle to zamana bhi badal jaega

phir bahaar aai hai gulshan ka nazara kar lo
warna ye waqt suhana bhi badal jaega

muflisi masnad-e-zardar pe qabiz hogi
mahal badlega zamana bhi badal jaega

kis ko malum tha anjam ye hoga 'azhar'
ghar badalte hi gharana bhi badal jaega