mohabbat wo maraz hai jis ka chaara ho nahin sakta

By

mohabbat wo maraz hai jis ka chaara ho nahin sakta
jigar ka ho ki dil ka zakhm achchha ho nahin sakta
wo nala koi nala hai jo kam ho mauj-e-tufan se
wo aansu koi aansu hai jo dariya ho nahin sakta
tamasha hai ki hum us ko masiha dam samajhte hain
hamare dard ka jis se mudawa ho nahin sakta
mujhe fariyaad par mail na kar ai josh-e-nakaami
zamane-bhar mein dil ka raaz ruswa ho nahin sakta
ajab kya hai jo khamoshi hi sharh-e-arzu kar de
mere lab se to izhaar-e-tamanna ho nahin sakta
mubarak ho tujhi ko ye khayalistan ai waiz
teri duniya mein rindon ka guzara ho nahin sakta
tamasha ho gaya hai tere jalwon ka tamashai
koi is shan se mahw-e-tamasha ho nahin sakta
badal sakte ho tum bigdi hui qismat zamane ki
tumhaari ek nigah-e-naz se kya ho nahin sakta

mail-zabt bhi aamada-e-fariyaad bhi hai

By

mail-zabt bhi aamada-e-fariyaad bhi hai
dil giraftar-e-mohabbat bhi hai aazad bhi hai
dastan-e-dil-e-masum na puchh ai hamdam
ye wo basti hai jo aabaad bhi barbaad bhi hai
ai mere zabt ko kaamil na samajhne wale
qabil-e-dad meri koshish-e-fariyaad bhi hai
ud ke jaun bhi to kya aur na jaun bhi to kya
muntazir barq bhi hai tak mein sayyaad bhi hai
kya likhun kya na likhun surkhi-e-afsana-e-dil
gham bhi hai dard bhi hasrat bhi hai fariyaad bhi hai
dil-e-diwana ki to hasti-e-hushiyar na puchh
ye giraftar-e-qafas tair-e-azad bhi hai
meri taskin to kar bhul ke itna to bata
yaad rakhne ka jo wada tha tujhe yaad bhi hai
ek 'rawish' dil ki ho ai 'arsh' to kuchh baat bhi ho
kya musibat hai ki ye shad bhi nashad bhi hai

lutf hi lutf hai jo kuchh hai inayat ke siwa

By

lutf hi lutf hai jo kuchh hai inayat ke siwa
hai mohabbat se siwa jo hai mohabbat ke siwa
doston ke karam-e-khas se bachne ke liye
koi gosha na mila gosha-e-uzlat ke siwa
mujh se shikwa bhi jo karte hain to ye kahte hain
kuchh bhi aata nahin kya tujh ko shikayat ke siwa
aap ke khat ko main kis baat ka khummar kahun
is mein sab kuchh hai bas ek harf-e-mohabbat ke siwa
jis qadar chahun gunahon pe hansun khub hansun
ye ilaj aur bhi hai ashk-e-nadamat ke siwa
shaikh hi hoga jo milte nahin do-chaar ayagh
kaun aa sakta hai maikhane mein hazrat ke siwa
wo jo kahte hain ki hai fahm-o-farasat hum se
aise logon mein sabhi kuchh hai farasat ke siwa
nahin malum ki kyun ruh isi se khush hai
ranj to aur bhi hain ranj-e-mohabbat ke siwa
rah gae rah-e-amanat mein malaek thak kar
marhala tai na hua ye meri himmat ke siwa
tum ko malum ho ai shaikh-o-barahman to kaho
aur bhi koi ibaadat hai mohabbat ke siwa
is nai baat ko bhi 'arsh' kabhi socha hai
aaj-kal sher mein jiddat hai to jiddat ke siwa

kyun na ho dad-talab himmat-e-mardana-e-dil

By

kyun na ho dad-talab himmat-e-mardana-e-dil
mail-e-husn-e-jahan-soz hai parwana-e-dil
ek ibrat ka muraqqa hai alam-khana-e-dil
hasrat-o-yas ka afsana hai afsana-e-dil
jis ko rahti hai kisi aur ke jalwe ki talash
us ne dekha hi nahin jalwa-e-jaanana-e-dil
ab main samjha ki mohabbat mein asar hai kitna
log sunte hain bade shauq se afsana-e-dil
qabil-e-dad hai ye shauq-e-talab ai saqi
le ke aaya hun main tuta hua paimana-e-dil
ek zamane ko jila deta hai jal kar ai 'arsh'
shola-e-barq-e-jahan-soz hai parwana-e-dil

kya chaara karen kya sabr karen jab chain hamein din-raat nahin

By

kya chaara karen kya sabr karen jab chain hamein din-raat nahin
ye apne bas ka rog nahin ye apne bas ki baat nahin
jo us ne kiya achchha hi kiya jo hum pe hua achchha hi hua
ab girya-o-gham kuchh chiz nahin ab nala-e-gham kuchh baat nahin
hum sabr-o-raza ke bande hain jo tum ne kiya sab jhel liya
ab dil mein bhi afsos nahin ab lab par bhi haihat nahin
jab ulfat ka dam bhar baithe jab chaal hi ulti chal baithe
nadan ho phir kyun kahte ho is chaal mein bazi mat nahin
kuchh ranj nahin kuchh fikr nahin duniya se alag ho baithe hain
dil chain se hai aaram se hai aalam nahin aafat nahin
tum lutf ko jaur batate ho tum nahaq shor machate ho
tum jhuti baat banate ho ai 'arsh' ye achchhi baat nahin

kisi naghme mein hai wo aur na kisi saz mein hai

By

kisi naghme mein hai wo aur na kisi saz mein hai
ras-bhari narm si lai jo teri aawaz mein hai
gosh mushtaq ki khud-sakhta tafriq hai ye
warna jo saz hai bahar hai wahi saz mein hai
le na dube kahin khush-fahmi-e-idrak tujhe
na-khudai teri poshida isi raaz mein hai
aap hi zinda karen murda tamannaon ko
qum-be-izni ka asar aap ki aawaz mein hai
ham-safiron ki sadaon ka asar hai shayad
har giraftar-e-qafas koshish-e-parwaz mein hai
kyun karen ghair se hum arz niyaz-e-ulfat
jis ke talib hain abhi jalwa-gah-e-naz mein hai
'arsh' tak dekhiye pahunche ki na pahunche koi
aah ke sath dua bhi meri parwaz mein hai