hauslon se bikhar bhi jata hun

By

hauslon se bikhar bhi jata hun
main misalon se dar bhi jata hun
zindagi ka safar bhi jari hai
sham hote hi ghar bhi jata hun
ghaur se dekhta hun duniya ko
raston se guzar bhi jata hun
han jahan par sawal ugte hain
hasb-e-adat udhar bhi jata hun
jhut ke sach ke darmiyan kabhi
main takalluf se mar bhi jata hun

duaen mangne walon ka intishaar hai kya

By

duaen mangne walon ka intishaar hai kya
ye mah-o-sal ka udta hua ghubar hai kya
koi sabab hai ki yarab sukun hai itna
mujhe khabar hi nahin hai ki intizar hai kya
agar ho dur to qaem hai did ka rishta
agar qarib ho manzar to ikhtiyar hai kya
yahi ki aaj parindon se sham khali hai
yahi ki mausam-e-jaan ka bhi eatibar hai kya
bahut dinon se tabiat bujhi bujhi si hai
agar hai kuchh to ghadi-do-ghadi shumar hai kya

buri KHabar hai use mushtahar nahin karte

By

buri khabar hai use mushtahar nahin karte
kisi ke aib ko yun be-hunar nahin karte
mere buzurg hain tul-e-kalam ke shaida
kahaniyon ko kabhi mukhtasar nahin karte
mujhe bhi shauq hai duniya ko fath karne ka
magar pahad ko ujlat mein sar nahin karte
na jaane kaun sa mausam ho phul-patton ka
isi liye to ye paude safar nahin karte
main aaj apne hi akhlaq se pareshan hun
takallufat mujhe mo'atabar nahin karte

baat ye hai sada nahin hota

By

baat ye hai sada nahin hota
koi achchha bura nahin hota
qarz hai aur phir hamara dil
aadaton se juda nahin hota
dusra aadmi to dozakh hai
main kabhi dusra nahin hota
itna manus hun main duniya se
koi pal ho gila nahin hota
nind kyun zindagi se darti hai
aur suraj sila nahin hota
aish-o-aram tere bare mein
main ne dekha suna nahin hota

apne hi ghar ke samne hun but bana hua

By

apne hi ghar ke samne hun but bana hua
parde hate hue hain daricha khula hua
yun hi idhar udhar ki sunate raho mujhe
mausam bahut udas hai dil hai dukha hua
aawaz de ke puchh lo kya ho gaya use
wo shakhs ja raha hai bahut sochta hua
kyun dekhta hai ajnabi nazron se wo mujhe
main baithe baithe jaise koi dusra hua
harf-e-dua hai pas na lab par shikayaten
jo kuchh hua yahan pe wo yarab bura hua

pahle bante the makan basne basane ke liye

By

pahle bante the makan basne basane ke liye
ab makan bante hain duniya ko dikhane ke liye
ishq to ye hai tere nam pe mit jaun main
kyun likhun nam hatheli pe mitane ke liye
tera aashiq tere qadmon se lipat jaega
ruthne wale tujhe aaj manane ke liye
gham-zada dekh ke hansta hai zamana 'ishraq'
hansna padta hai yahan gham ko chhupane ke liye