rah-e-KHirad mein jahan sar hai dard-e-sar bhi hai

By

rah-e-khirad mein jahan sar hai dard-e-sar bhi hai
ki gu-magu bhi agar bhi hai aur magar bhi hai
faqih-e-shahr muazzaz bhi mo'atabar bhi hai
magar marasim-e-ulfat se be-khabar bhi hai
teri nazar ki nazar bhi nahin nazar bhi hai
jise hamari khabar bhi nahin khabar bhi hai
yahan ki qaid se ghabra raha hai diwana
ki is dayar mein diwar bhi hai dar bhi hai
jahan-e-ariz-o-gesu ajib duniya hai
ki jis mein sham bhi hai sath hi sahar bhi hai
ye dil ki wadi-e-aiman mein kaun aa utra
ki jo jamal-e-nahufta bhi jalwa-gar bhi hai
jo rah ahl-e-khirad ke liye hai la-mahdud
junun-e-jazba-e-ulfat mein mukhtasar bhi hai

koi nahin ki jise aashna-e-raaz karen

By

koi nahin ki jise aashna-e-raaz karen
to kyun na phir gham-e-dil hi se saz-baz karen
bana ke un ko bhi khugar niyaz-e-paiham ka
wo din bhi aae ki hum bhi buton se naz karen
hisab ho chuka kotah-dastiyon ka to ab
khayal-e-silsila-e-gesu-e-daraaz karen
agar sharab mein masti bhi hai khumar bhi hai
to kyun na aarzu-e-chashm nim-baz karen
nazar mein tundi-e-tishna-labi badha ai shauq
ki jis se har dil-e-mina ko phir gudaz karen
huzur-e-pir-e-mughan laghzishon ki pursish hai
lo aao apne bhi qadmon ko sarfaraaz karen
safar shabab ka gar uzr tha to ab sar-e-sham
qaza-e-umr padhen niyyat-e-namaz karen

jo dam mein dam hai to saqi ki justuju hi sahi

By

jo dam mein dam hai to saqi ki justuju hi sahi
nahin sharab to sauda-e-arzu hi sahi
jo bandhna hai tasawwur hi apni aankhon mein
to phir piyala-o-saghar hi kyun subu hi sahi
salat-e-shara nahin jis ka ehtimam karen
namaz-e-ishq hai ai dil to be-wuzu hi sahi
junun mein chaak hai daman to fikr-e-sozan kya
jo ban gaya hai gareban to be-rafu hi sahi
jo hai sharab harifan-e-baada-paima ko
hamare waste mauzu-e-guftugu hi sahi
agar khayal mein khwabon ki gunj baqi hai
to aankh khulte hi ghogha-e-ha-o-hu hi sahi
fasana apne junun ka zaban zaban pe hai aaj
nahin jo sahra-ba-sahra to ku-ba-ku hi sahi
jafa-e-naz agar hai babang-e-tabl-o-duhal
to dil-dukhon ka gila surma-dar-gulu hi sahi

jaan ek but pe fida karte ho kya karte ho

By

jaan ek but pe fida karte ho kya karte ho
phir bhi ummid-e-wafa karte ho kya karte ho
hum se paiman-e-wafa karte ho kya karte ho
tark dastur-e-wafa karte ho kya karte ho
wada karte ho wafa karte ho kya karte ho
jurm-e-qanun-e-jafa karte ho kya karte ho
kar ke kaunain ko zanjiri-e-gesu-e-daraaz
zulf-e-pechan ko duta karte ho kya karte ho
khak mein hum ko milaya to bahut khub kiya
ab pasheman hua karte ho kya karte ho
hum ko khud kar ke giraftar-e-bala hazrat-e-dil
ab ye kahte ho bura karte ho kya karte ho
ghar jo zindan hai to virana bana deta tha
dar-o-diwar taka karte ho kya karte ho
khun-e-dil ashkon se bola ye umand kar kal raat
aap hi aap baha karte ho kya karte ho
pairahan jo ki gareban hi raha aur na jeb
is ko baithe jo siya karte ho kya karte ho

id hai aur saqi-e-nau-KHez maiKHane mein hai

By

id hai aur saqi-e-nau-khez maikhane mein hai
aaj pine ka maza pi kar bahak jaane mein hai
kaif-o-masti jo teri aankhon ke khum-khane mein hai
wo teri mina mein hai saqi na paimane mein hai
hai gham-e-diwar us ko aur na fikr-e-pairahan
kya faraghat tere diwane ko virane mein hai
gar jalane mein jigar ka khun hai lutf-e-intizar
hijr ki lazzat bhi mar mar ke jiye jaane mein hai
us ki nazren bhanp leti hain tujhe har rang mein
kis bala ki hoshiyari tere diwane mein hai
aur uljhate chale jate ho mere subh-o-sham
jab se tum ko ye shaghaf gesu ke suljhane mein hai
ab bala se ho charagh-e-dair ya sham-e-haram
qasd jal kar khak ho jaane ka parwane mein hai