ishq mein koi zaman aur na makan hota hai

By

ishq mein koi zaman aur na makan hota hai
wo do-alam se alag ek jahan hota hai
kis qadar un ki tabiat pe garan hota hai
jis fasane mein wafaon ka bayan hota hai
shiddat-e-shauq ka allah re fusun uf re fareb
un ki nafrat pe mohabbat ka guman hota hai
sirf ek dil hi wo mabad hai wo ek mabad-e-ishq
jis mein naqus ham-awaz-e-azan hota hai
un se is tarah juda ho ke hum aae hain ki hae
aankh se jaise koi ashk rawan hota hai
husn ke haq se koi ohda-bar-a kya hoga
ishq ka haq bhi ada hum se kahan hota hai
apni sozish mein bhi hota hai jahannum mahsus
ghair ki aag ka shoala bhi dhuan hota hai
sunne wale hi pe hai munhasir andaza-e-gham
warna jo haal hai wo kis se bayan hota hai
ghair ki aag mein jalne ka maza hai kuchh aur
warna parwana bhi khud shoala-ba-jaan hota hai
hae is ishq mein insan ka jawan mar jaana
jaise kambakht isi din ko jawan hota hai
sath har sans ke aata hai zaban par tera nam
dil mein jo kuchh ho wahi wird-e-zaban hota hai
jis janaze pe barasti hui hasrat dekhun
us janaze pe mujhe apna guman hota hai
ishq mein hae tabiat ka wo aalam 'bismil'
aalam-e-ishq bhi jab dil pe garan hota hai

ishq ki allah ri dushwariyan

By

ishq ki allah ri dushwariyan
ek junun aur lakh zimmedariyan
ehtimam-e-zindagi-e-ishq dekh
rose mar jaane ki hain tayyariyan
ishq ka gham wo bhi tere ishq ka
kaun kar sakta meri gham-khwariyan
be-khudi-e-ishq jaise gham ki nind
gham ki ninden ruh ki bedariyan
ek junun-e-ishq par qurban hain
hikmat-o-irfan ki sau hushyariyan
ishq bhi hai kis qadar bar-khud ghalat
un ki bazm-e-naz aur khuddariyan
chhut kar rah jaen nabzen ishq ki
sahal ho jaen agar dushwariyan
ye niyaz-e-arzumandi na dekh
aur kuchh hain ishq ki khuddariyan
ek nigah be-niyaz-e-ishq tak
husn ki hain sab ghalat-pindariyan
ai jawani ai mohabbat marhaba
phir na ye ninden na ye bedariyan
ikhtilaj-e-qalb ke daure nahin
ishq ki 'bismil' hain dil-azariyan

ishq hun to sham-e-husn-e-yar ka parwana hun

By

ishq hun to sham-e-husn-e-yar ka parwana hun
husn hun to main charagh-e-kaba-o-but-khana hun
meri hasti kar-farma hai jahan tak dekhiye
rind hun main jam hun main saqi-e-mai-khana hun
koi diwana mujhe kahta hai saudai koi
waqia ye hai ki mahw-e-jalwa-e-jaanana hun
main hun un ki ibtida aur wo hain meri intiha
khatm ho jo husn par wo ishq ka afsana hun
han jala de khak kar de phunk de hasti meri
tu to sham-e-husn hai main to tera parwana hun
tum ho aalam tum se hai aalam magar ba-in-hama
tum ho aalam-ashna main tum se bhi begana hun
main hudud-e-shara se bahar nahin 'bismil' magar
kahne do jo kuchh kahun diwana hun diwana hun

is tarah duniya mein dil ko mahram-e-gham kijiye

By

is tarah duniya mein dil ko mahram-e-gham kijiye
jab khushi koi mayassar ho to matam kijiye
ishq se phir silsila jumbani-e-gham kijiye
zindagi par maut ko pahle muqaddam kijiye
husn ki jaanib nigah-e-shauq ya kam kijiye
ya nigah-e-shauq ko ek ahd-e-mohkam kijiye
maut ka kya maut ka to sau tarah gham kijiye
zindagi nashad ka kis tarah matam kijiye
dekh kar ahl-e-tarab ka saz-o-saman-e-tarab
bad-nasibon ka zara andaza-e-gham kijiye
jaane kis aalam ki hasrat mein hain nazren muztarib
warna kya nazzara-e-husn-e-do-alam kijiye
ab junun ki sarhadon se aa mila hai josh-e-ishq
kuchh samajh kar ab nigah-e-husn barham kijiye
ahl-e-ishrat apni bazm-e-aish-o-ishrat ke qarib
ehtiyatan munaqid ek bazm-e-matam kijiye
aansuon ka ponchhne wala hi jab koi na ho
aah kis ummid par aankhon ko pur-nam kijiye
gham ko hone dijiye ho jis qadar manus dil
dil ko jitna ho sake begana-e-gham kijiye
phir qafas se laut kar aae chaman mein phir wahi
aashiyan ke waste tinke faraham kijiye
hain nigahon ki hadon se dur abhi bebakiyan
shokh chitwan se ghurur-e-husn ko kam kijiye
ta-kuja aawara-e-nazzara chashm-e-husn-e-dost
jama ek markaz pe kyun kar husn-e-alam kijiye
har khushi ne is natije par hamein pahuncha diya
jab khushi koi mayassar ho to matam kijiye
aarzu se badh ke dushman koi insan ka nahin
jis qadar mumkin ho 'bismil' aarzu kam kijiye

iltijaen karne wale ko dua se kya gharaz

By

iltijaen karne wale ko dua se kya gharaz
jis ko ho tujh se gharaz us ko khuda se kya gharaz
pi raha hai muskura kar jam-e-sehat maut ka
tere bimar-e-mohabbat ko shifa se kya gharaz
ishq kashti apni khud kheta hai apne zor par
na-khuda se wasta kya aur khuda se kya gharaz
main hun aur ab aastan-e-ishq ki hain azmaten
ab mere sajdon ko tere naqsh-e-pa se kya gharaz
dil ko ab zauq-e-mohabbat ke maze aane lage
tujh se ab teri jafa se ya wafa se kya gharaz
o nigah-e-multafit be-faeda hai iltifat
dard hi dil mein nahin hai ab dawa se kya gharaz
ab ghataen mai-kade par chhain to main kya karun
be-dili ko dawat-e-ab-o-hawa se kya gharaz
ruh ko baalidgi ho jis mein ab wo dil nahin
ham-nashin mujh ko bahaar-e-jaan-faza se kya gharaz
kis qadar khush rah ke mar jate hain mazluman-e-ishq
koi ye samjhe inhen roz-e-jaza se kya gharaz
qahr ko bhi jis ke ho ek darguzar se wasta
us ki rahmat ko mere jurm-o-khata se kya gharaz
ab dil-e-nakaam mein wo nala-o-naghma kahan
'bismil' ek saz-e-shikasta ko sada se kya gharaz

hawas ki duniya mein rahne walon ko main mohabbat sikha raha hun

By

hawas ki duniya mein rahne walon ko main mohabbat sikha raha hun
jahan pe daman bichhe hue hain wahan par aankhen bichha raha hun
surud-e-gham par bhi zindagi mein tarab ke dhaare baha raha hun
main un ke saz-e-jafa par apni wafa ke naghme suna raha hun
ilahi duniya mein aur kuchh din abhi qayamat na aane pae
tere banae hue bashar ko abhi main insan bana raha hun
adam ke tarik raste mein koi musafir na rah bhule
main sham-e-hasti bujha kar apni charagh-e-turbat jala raha hun
main apni tarz-e-junun ke sadqe mera junun bhi ajab junun hai
kisi ka daman pakad raha hun kisi se daman chhuda raha hun
abhi to aaya hi tha wahan se kabhi na jaane ka ahd kar ke
magar mohabbat zahe mohabbat abhi wahin se phir aa raha hun
mili hai kanton ki mujh ko qismat magar hai phulon ki meri fitrat
jahan hun pamal-e-gham hun lekin jahan bhi hun muskura raha hun
chala hai shauq-e-sujud le kar ilahi ye kis ke dar ki jaanib
abhi to pahla qadam utha hai abhi se main sar jhuka raha hun
teri nazar kya main apne dil se bhi gir ke jata hun anjuman se
jahan ki hoti hai khatm duri wahan se bhi dur ja raha hun
ye kis ke kuche mein gamzan hun ye aastan kis ka samne hai
main apne qadmon par aaj 'bismil' sar-e-do-alam jhuka raha hun