koi din hoga ki haare hue lauT aaenge hum

By

koi din hoga ki haare hue laut aaenge hum
teri galiyon se gae bhi to kahan jaenge hum
aansuon ka to takalluf hi kiya aankhon ne
khun ke ghunt se kya shauq na farmaenge hum
zindagi pahle hi jine ki tarah kab ji hai
ab tere nam pe marne ki saza paenge hum
kab tak ai ahd-e-karam bandhne wale kab tak
dil ko samjhaenge bahlaenge phuslange hum
aah se arsh-e-mualla ko na larza denge
tu samajhta hai qayamat hi faqat dhaenge hum
lakh murtad sahi be-din nahin hain waiz
but nae hain to khuda kya na naya laenge hum
jawedani ka tasawwur mein bhi aaya na khayal
hum samajhte the tere ishq mein mar jaenge hum
bas ab ai dil ki qasam khai hai us zalim ne
jo tadapta hai use aur bhi tadpaenge hum
dur tujh se to qaza bhi nahin le jaegi
sar bhi aakhir teri diwar se takraenge hum
bhulta hi nahin hum ko wo sitamgar 'rahil'
khak use yaad na karne ki qasam khaenge hum

chhin gae KHud se tumhaare ho gae

By

chhin gae khud se tumhaare ho gae
tum pe aashiq dil ke mare ho gae
kuchh din aawara phire sayyara-war
rah gae tum par sitare ho gae
tujh pe qurban ai jamal-e-ahd-e-soz
jis ke biyahe bhi kunware ho gae
kya usi ko kahte hain rabt-e-dili
chor dil ke jaan se pyare ho gae
hum the tere khaksaron mein shumar
hasidon mein chand-tare ho gae
chaar nazren chaar baaten chaar din
hum tumhaare tum hamare ho gae
ek nazar karne se tera kya gaya
ahl-e-dil ke ware-nyare ho gae
kuchh to khud dil phenk the 'rahil' hum
kuchh udhar se bhi ishaare ho gae

ajib intishaar hai zamin se aasman tak

ajib intishaar hai zamin se aasman tak
ghubar hi ghubar hai zamin se aasman tak
wabaen qaht zalzale lapak rahe hain pai-ba-pai
ye kis ka eqtidar hai zamin se aasman tak
bisat-e-khak bhi tapan khala bhi hai dhuan dhuan
bas ek azab-e-nar hai zamin se aasman tak
giraft panja-e-fana mein khasta-haal-o-khun-chakan
hayat-e-mustaar hai zamin se aasman tak
fughan-o-ashk-o-ah ka jigar-gudaz silsila
ba-lutf-e-kirdigar hai zamin se aasman tak
mata-e-jabr-e-zindagi hamein bhi jis ne ki ata
usi ka ikhtiyar hai zamin se aasman tak
faraaz-e-arsh ke makin shikasta-dil hamin nahin
har ek be-qarar hai zamin se aasman tak

jab se dil mein tere baKHshe hue gham Thahre hain

By

jab se dil mein tere bakhshe hue gham thahre hain
mahram aur bhi apne liye hum thahre hain
gham ki har daur mein thahrae gae hasil-e-zist
aur is daur mein hum sahab-e-gham thahre hain
hum teri rah mein utthe hain bade azm ke sath
gardish-e-dahr bhi thahri hai jo hum thahre hain
shauq-e-awargi-o-shauq talab ke qurban
uth gae hain to kahan apne qadam thahre hain
main tasawwur se kabhi jin ke laraz uthta tha
wahi haalat mohabbat ka bharam thahre hain
maghfirat hi sahi mai-khana-o-mai ke mani
ki yahan aaj safiran-e-haram thahre hain
sirf aankhon hi mein kam ruk na sake meri 'rais'
mere aansu kisi daman mein bhi kam thahre hain

yak Thaar u nigar khaDi thi nazar paDi

yak thaar u nigar khadi thi nazar padi
yak bul-hawas ke hat chadi thi nazar padi
kaswat newi nayan mein khumari badan pe jot
lat khis pati sun mukh pe padi thi nazar padi
moti sun hor sune se na jaanon diya hai kun
bhar sab apas ke tan kun mudi thi nazar padi
baalan mein tel bar mein gulan bhar gala sandal
tambul ki adhar pe dhadi thi nazar padi
'bahri' ab us pari ki parat kun patiya nako
bazi kuchh aur bhant khadi thi nazar padi

hain ab to hile-bahane ke qil-o-qal ke din

By

hain ab to hile-bahane ke qil-o-qal ke din
bhula ke rakh diye tu ne meri majal ke din
ki dukh ne kucha-e-shab par kar liya shayad
tulua hone lage is liye malal ke din
har ek lafz pasheman pas-e-ghubar-e-sukut
jawab ki wo hon raaten ki phir sawal ke din
charagh-e-saut-o-sada aaj kuchh munawwar hai
visal-e-shab ke qarin hain mere ghazal ke din
ye intizar ki ghadiyan ye shab ka sannata
us ek shab mein bhare hain hazar sal ke din