sitare palkon pe jalwa-gar the shikast-e-azm-e-fughan se pahle

By

sitare palkon pe jalwa-gar the shikast-e-azm-e-fughan se pahle
gham-e-nihan se zamana waqif tha sharh-e-soz-e-nihan se pahle
hamari hi sai-e-justaju ne suragh-e-manzil diya jahan ko
talash-e-manzil mein hum rawana hue the har karwan se pahle
pasand aaya na bijliyon ko koi jo kartin tawaf un ka
mile kai aur bhi nasheman unhen mere aashiyan se pahle
sitam-rasidon ki anjuman mein chhide hain jab zalimon ke charche
tumhaara nam aa gaya hai aksar zaban par aasman se pahle
unhen ye zid hai sunenge meri zaban se mera fasana-e-gham
main sochta hun fasana-e-gham sunaun bhi to kahan se pahle
tumhaari khalwat-kade ke parde uthe hue hain durust lekin
chhuda to lun daman-e-nazar ko tahayyur-e-be-karan se pahle
gharaz ke bande hain ahl-e-alam nahin koi ba-wafa jahan mein
na kijiye faisla abhi ye 'nasir' ke imtihan se pahle

shikwa-e-gham bhi gaya taqat-e-goyai bhi

By

shikwa-e-gham bhi gaya taqat-e-goyai bhi
bhul jata hun koi baat jo yaad aai bhi
dekhna bhi nahin us samt gawara un ko
khatm hai silsila-e-hausla-afzai bhi
jab se andaz-e-bahaaran mein taghayyur aaya
mit gaya dil se khayal-e-chaman-arii bhi
har taraf bang-e-jaras bang-e-dara bang-e-azan
sone wale hain ki lete nahin angdai bhi
kaun ab hum ko tajalli ki haqiqat samjhae
ho gae gum tere jalwon mein tamashai bhi
kitni mushkil hai kisi sher ki tahlil 'nasir'
kitni dushwar hai ehsas ki girai bhi

sawal shukr-o-shikayat ka ab raha hi nahin

By

sawal shukr-o-shikayat ka ab raha hi nahin
wo kaj-shiar meri samt dekhta hi nahin
kisi mein hausla-e-tark-e-muddaa hi nahin
ye wo mahaz hai jis par koi data hi nahin
thama jo khair se tufan to hai bhanwar aage
mere khilaf samundar bhi hai hawa hi nahin
wo jis ka khauf gunahon se rok deta hai
hamare daur mein aisi koi saza hi nahin
jahan se pech-o-kham-e-rah ka hua aaghaz
palat ke hum ne jo dekha to rahnuma hi nahin
jabin-e-shauq bata ab kahan karun sajda
mujhe talash thi jis ki wo naqsh-e-pa hi nahin
faza hai dang samaat ke us taghayyur par
koi sada-e-mohabbat se aashna hi nahin
'nasir' ja ke teri anjuman se laut aaya
gaya tha jis ke irade se wo kaha hi nahin

samajh rahe the ki ab shab gai sahar aai

By

samajh rahe the ki ab shab gai sahar aai
tere dayar mein wo raushni nazar aai
nishat-o-gham ka talluq bhi kya talluq hai
abhi hanse bhi na the hum ki aankh bhar aai
mana rahe hain manana tha jin ko jashn-e-bahaar
mere nasib mein tazin-e-baam-o-dar aai
ye aur baat ki sab kuchh kaha ho sach tu ne
mujhe hansi to teri baat baat par aai
kamal hai ye tasawwur ki mashq-e-paiham ka
tere hijab ki taswir bhi utar aai
wasuq-e-azm pe hain kaamraniyan mauquf
khayal-e-rahguzar aate hi rahguzar aai
bala se ahd-e-bahaaran ne dil ko zakhm diye
'nasir' surat-e-gulzar to nikhar aai

na kaliyan muskuraati hain na phulon par nikhaar aae

By

na kaliyan muskuraati hain na phulon par nikhaar aae
badi be-kaifiyon ke sath ayyam-e-bahaar aae
koi qimat nahin aise wafa ke ahd-o-paiman ki
mujhe jis par yaqin aae na un ko e'tibar aae
jahan ke chappe chappe par guman hota tha manzil ka
meri manzil mein aise marhale bhi be-shumar aae
haqiqat us ke dil se puchhiye jazb-e-mohabbat ki
samajh mein jis ke mafhum-e-nigah-e-sharmsar aae
nizam-e-gulsitan zarf-e-tamanna se ibarat hai
tere daman mein phul aae mere daman mein khar aae
mariz-e-gham ke lab par nam un ka bar bar aaya
phir us ke baad chaarasaz aae gham-gusar aae
'nasir' aaya tawaf-e-ku-e-jaanan ras kab dil ko
tamanna-e-sukun le kar gae aur be-qarar aae

KHusha ye zarf ki honTon pe hai tabassum bhi

By

khusha ye zarf ki honton pe hai tabassum bhi
liye hue hain tah-e-chashm sail-e-qulzum bhi
ye inqalab-e-mohabbat ye ijtinab tera
hai nagawar nigahon ka ek tasadum bhi
usi chaman mein hain aise hazar-ha ghunche
nasib ho na saka jin ko ek tabassum bhi
ye kya zarur ki us ne kiya ho yaad magar
kabhi kabhi to maza de gaya tawahhum bhi
hai tarjuman-e-gham-e-dil khamoshi-e-paiham
suna raha hun unhen haal-e-be-takallum bhi
shanawari pe jinhen naz tha wo dub gae
mere liye to sahaara bana talatum bhi
suna rahe ho kise dastan-e-gham aakhir
'nasir' dub gae ab to mah-o-anjum bhi