dekh kar maqtal mein KHanjar us sitam-ijad ka

dekh kar maqtal mein khanjar us sitam-ijad ka
maut boli aaj mauqa hai mubarakbaad ka
ye taghaful wajh-e-taskin hai dil-e-nashad ka
bhul jaana bhi tumhaara ek sabab hai yaad ka
paikar-e-andaz kis ka khinchte khinchte rah gaya
aaj kyun utra hai chehra mani-o-bahzad ka
hum ko kuchh dozakh se matlab hai na jannat se gharaz
hai baja lana muqaddam aap ke irshad ka
kis ke jazb-e-husn ne tasir sari chhin li
aaj kyun khali hai gosha daman-e-fariyaad ka
ya-ilahi is dil-e-betab ki tamir mein
kis ne patthar rakh diya tha ishq ki buniyaad ka
minnaton par meri kahte hain wo kis andaz se
kyunki ho rishta pari-zadon se aadam-zad ka
dagh-e-dil hain ya koi gul-dasta-e-alam-fareb
hai dil-e-pur-dagh ya gulshan koi shaddad ka
ud gae hathon ke tote jab se bulbul ne suna
khub tuti bolta hai in dinon sayyaad ka
un ke kuche mein mila ye phal mohabbat ka mujhe
nam 'ashiq' hai laqab hai khanaman-barbaad ka

daghon se dil-o-sina ke afroKHta-jaan hun

daghon se dil-o-sina ke afrokhta-jaan hun
go main chaman-e-taza hun par waqf-e-khizan hun
pahlu mein agar dil hai to tu dil mein hai mere
go nang-e-khalaeq hun magar jaan-e-jahan hun
jis khak pe main baith gaya fitna uthaya
kis sarw-e-khiraman ki kaf-e-pa ka nishan hun
hamrah tumhaare hun kisi ja hun kahin hun
saya ki tarah tum ho jahan main bhi wahan hun
yarab ho bura wahshat dil ka ki nahin chain
jab khak hua mar ke to ab reg-e-rawan hun
kya zist hai ye khak meri aashiq-e-nashad
gah masraf-e-fariyaad hun gah waqf-e-fughan hun

mere dukh ka tu andaza laga de

mere dukh ka tu andaza laga de
khushi ko apni khud hi tu mita de
hawa itrae phirti hain jo khud par
agar himmat ho suraj ko bujha de
sitare siskiyan bharte hai shab-bhar
kabhi to aankh bhi gham ka pata de
dil-e-bimar ko rashk-e-masiha
jo ho mahbub ab aisi dua de
muqabil se chala ye kaun uthkar
ke jaise sham-e-dil koi bujha de

tishna-kaami mein riayat nahin karne wale

By

tishna-kaami mein riayat nahin karne wale
hum amanat mein khayanat nahin karne nahin karne wale
raushni hum pe inayat nahin karne wali
hum charaghon se shikayat nahin karne wale
hum se ye kar-e-musafat nahin hone wala
zindagi teri qayaadat nahin karne wale
hum se ayyam ki gardish nahin dekhi jati
khair hum is ki wazahat nahin karne wale
hasb-e-maqdur hamein khak udani hai so hum
jism-e-khasta ki marammat nahin karne wale
phir wahi khwab wahi zid nahin 'aqib-sabir'
hum usulon se baghawat nahin karne wale

nafas nafas zindagi ke ho kar ajal ki tashhir kar rahe hain

By

nafas nafas zindagi ke ho kar ajal ki tashhir kar rahe hain
ye kis jatan mein lage hain hum sab kise jahangir kar rahe hain
kahan pata tha teri shafaq hi pas-e-ghubar-e-zawal hogi
tujhi ko mismar kar diya tha teri hi tamir kar rahe hain
rah-e-shahadat pe sar ke hamrah ek aaseb chal raha hai
hamin yazid-e-ahd na niklen ki khud ko shabbir kar rahe hain
sadaen deti hui khalaen kahin zaminon tak aa na jaen
ye khwab-kari ye pur-takalluf bara-e-tabir kar rahe hain
agarche pahle yaqin kam tha par ab to tasdiq ho chuki hai
na jaane radd-e-amal mein kyun hum mazid takhir kar rahe hain
hamare sare gunah waiz-e maqal-e-iftitahiya hain
abhi to hum nama-e-amal ka muqaddama tahrir kar rahe hain

rote rote os boli mera chehra dekh kar

By

rote rote os boli mera chehra dekh kar
tum batao kya mila hai khwab us ka dekh kar
ek shikari ka wo bachcha hae wo nanha sa phul
main qafas mein laut aaya dasht sara dekh kar
intihai dhup se bhi ek qadam aage ki dhup
aah ye bhi bujh rahi hai mera saya dekh kar
thaharna to zat ka tha us pe ye bechain jism
chand tare ro pade hain bahta dariya dekh kar
dusri duniya se bachne ke liye pite hain hum
hum bahut ukta gae hain ek duniya dekh kar