jal kar un aankhon mein aansu jab kajal ban jate hain

jal kar un aankhon mein aansu jab kajal ban jate hain
dil se uth kar reg bagule dal baadal ban jate hain
koi sachchi baat zaban par jab bhi kabhi aa jati hai
wo sahra ho ya gulshan ho sab maqtal ban jate hain
jab bhi zehn mein jag uthti hai in honton ki shirini
kaise kaise talkh masail jaan ghazal ban jate hain
us se ziyaada kya hoga arbab-e-mohabbat ka izhaar
wo bekal ho jate hain to sab bekal ban jate hain
hum ne sadiyon ki diwaron mein jo rakhne dale the
un se guzarne wale lamhe taj-mahal ban jate hain

jahan sarab nahin thi wahan sarab mile

jahan sarab nahin thi wahan sarab mile
haqiqaton ko tatola gaya to khwab mile
har ek samt se aawaz-e-bazgasht aai
is aarzu mein pukara tha kuchh jawab mile
hamein bahaar ke aasar ki tawaqqoa thi
rukh chaman pe nishanat-e-inqalab mile
kahaniyon ki kitabon mein ab milen to milen
wo khush-nazar jinhen zarron mein aaftab mile

humne mohkam jinhen jaana wo sitare TuTe

hum ne mohkam jinhen jaana wo sitare tute
mauj sahil se jo guzri to kinare tute
ahl-e-dil soch rahe hain ye bade karb ke sath
hum hi zanjir hue dil bhi hamare tute
aaj har zehn mein raushan mein tafakkur ke charagh
dil wo shoala hai ki jis se ye sharare tute
aap ne jin pe nazar ki wahi zarre chamke
hum jinhen dekh rahe the wo sitare tute

hum ahl-e-dil bhi agar fikr-e-jaan-o-tan karte

hum ahl-e-dil bhi agar fikr-e-jaan-o-tan karte
to log husn pe izhaar-e-husn-e-zan karte
bhatak rahi hain khizan dida khar-o-khas ki tarah
wo kam nazar jo chale the chaman chaman karte
bahaar kab thi tera aaina ki diwane
qaba-e-gul ki tarah chaak pairahan karte
sanwarta na koi teri zulf-e-mushkin ko
jo hum bhi pairwi-e-ahu-e-khutan karte

ye sadma usko pagal kar gaya tha

ye sadma us ko pagal kar gaya tha
wo apne aaine se dar gaya tha
koi bhi sar nahin tha us ke qabil
abas us shahr mein patthar gaya tha
jahaalat ke hawale padhte padhte
kitabon se mera ji bhar gaya tha
pilata kaun us pyase ko pani
koi masjid koi mandar gaya tha
wo kis mitti ka tha nafrat ke ghar mein
wo odhe pyar ki chadar gaya tha
mera ehsas to tere karam se
mere marne se pahle mar gaya tha
na nikla phir wo sari umr ghar se
zara si der ko bahar gaya tha
tu phir luta hai kis ne qafile ko
udhar to sirf ek rahbar gaya tha
wahan phir pair kab rakkha kisi ne
jahan raste mein mera sar gaya tha