TV

bachcho dekho ye tv hai
is mein khubi hi khubi hai
deta hai ye sachchi khabren
sath mein khabron ke taswiren
is mein dikhte hain sab mele
natak manzar raili jalse
khel khiladi kashti danggal
bagh pahadi kheti jangal
jhil samundar naddi jharna
basti virana aur sahra
sare darinde aur charinde
machhli meindak aur parinde
is mein sab chizen dikhti hain
sair-e-jahan aankhen karti hain

sardi

sardi barish ke baad aati hai
ek shagufa naya khilati hai
din sikudta hai raat badhti hai
kohre ki hukmarani hoti hai
is mein shabnam tapakti hai gul par
is se hota hai khushk gulshan-e-tar
is mein aata hai barg-e-gul pe shabab
is mein khilte hain har tarah ke gulab
ye dikhati hai jab asar apna
sara mahaul hota hai thanda
jab hawa khub thandi chalti hai
jaan aafat mein sab ki aati hai
bachche budhe jawan mard o zan
sare mahsus karte hain uljhan
jism jab un ka tharaata hai
dant apne har ek bajata hai
ya to kambal mein raat katte hain
ya razai mein munh chhupate hain
shab ko chulha gharon mein jalta hai
din mein suraj se chain milta hai
shaal muflar se milti hai rahat
coat sweater se badhti hai chahat
jab hawa sard sard chalti hai
soch 'sahil' ki nazm banti hai

kya aur kaun

purane daur mein rahta tha ek kisan aisa
jo baat baat pe sab se sawal karta tha
hasin aur zahin apne donon beton ke
khud us ne nam bhi kya aur kaun rakkhe the
bada tha umr mein kya us se kaun tha chhota
sharir donon the aur qad tha donon ka uncha
ye waqia hai ki ek roz apni hajat se
zaif aaya koi un ke bap se milne
kaha ye donon ne is se abhi gae hain kahin
wo laut aaenge jaldi hamein hai is ka yaqin
agar ho kaam zaruri to baithiye baba
zaif soch ke kuchh un ke ghar mein baith gaya
sawal us ne kiya kya se kya hai nam tera
jawab hans ke diya kya ne kya hai nam mera
kaha zaif ne main sun saka na nam tera
khuda-ra phir se bata mujh ko tera nam hai kya
to kya ne zor se fauran kaha ki main kya hun
tumhaara beta hun baba tumhaara beta hun
zaif sun ke hua mushtail jawab us ka
rukh apna kaun ki jaanib phir us ne mod liya
kiya sawal ye us se hai bhai kaun tera
kaha ye kaun ne kya mera bhai hai baba
zaif zor se bola ki kya hai nam tera
kaha ye kaun ne main kaun hun mere baba
kiya sawal ye phir us se tera nam hai kya
mere sawal ko kya ab bhi tu nahin samjha
bata tu kaun hai ye sun ke kaun phir bola
main kaun hun ye haqiqat hai ai mere baba
kaha ye kya ne mera nam kya hai ai baba
nahin hai shak koi is mein hai bhai kaun mera
zaif sun ke ye aape se ho gaya bahar
kaha ki sharm ho tum par sharir-o-bad akhtar
ye kah ke tezi se bahar nikal gaya ghar se
sharir ladke magar khilkhila ke hanste rahe

garmi

sardi guzri garmi aai
sath mein apne halchal lai
garm hawa har-su chalti hai
suraj se dharti jalti hai
insanon ka haal bura hai
haiwanon mein hashr bapa hai
jhulas rahe hain ped aur paude
pighal rahe hain barf ke tode
sukh gae hain naddi nale
pad gae sab ki jaan ke lale
utra hua hai sab ka chehra
ghar ke bahar lu ka khatra
dhund raha hai har ek saya
garmi ne itna garmaya
thanda pani lassi sharbat
badh gai in se sab ki chahat
lemun ka ras aam ka patta
khate hain sab shauq se ganna
pankha tezi se chalta hai
jism magar phir bhi jalta hai
sab ki zaban par pani pani
bhej de maula barkha-rani

barsat

baadal garaj raha hai bijli chamak rahi hai
pur-kaif hain fazaen har shai damak rahi hai
baad-e-khunuk chaman mein bal kha ke chal rahi hai
barg-e-hina ki rangat pahlu badal rahi hai
chehre pe yasiyat ke nur-e-shabab chhaya
makhmal ka sabz qalin fitrat ne yun bichhaya
mayus har shajar ne badla libas apna
har murgh-e-khush-nawa ne chheda naya tarana
nikli sada-e-bulbul koyal ki kuk gunji
chidiyon ki chahchahahat lutf-e-hayat lai
tezi mein aa gai hai dariyaon ki rawani
maidan khet basti har samt pani pani
chashme ubal rahe hain nahren shabab par hain
naghmat-e-naujawani chang-o-rubab par hain
phulon se aur phalon se shakh-e-shajar ladi hai
ushshaq ke dilon mein uljhan si pad gai hai
sarsabz ho gaya hai viran sara jangal
jangal mein mach gaya hai har-su khushi ka mangal
khushbu-e-jaan-faza se har jaanwar magan hai
un ke rag-e-amal mein wo josh maujzan hai
inam-e-be-baha hai qudrat ka ye nazara
'sahil' sukun-e-dil hai fitrat ka ye nazara