ek gharib shair ki maut par

lamhon mein zindagi ka safar yun guzar gaya
sae mein jaise koi musafir thahar gaya
makhmur tha nashe mein gham-e-rozgar ke
hosh aa gaya to umr ka paimana bhar gaya
daulat bhi us ke hath na aai tamam-umr
kuchh nam hi na apna zamane mein kar gaya
sab us ke khair-khwah bulandi pe rah gae
shohrat ki sidhiyon se wo niche utar gaya
mauqa-parast aab-o-hawa mein na ji saka
apni ana ki qaid mein jaan se guzar gaya
maut us ki sari mushkilen aasan kar gai
ek bojh zindagi ka tha sar se utar gaya
afsos kam hua magar hairat bahut hui
jab 'khwah-makhwah' ain zaifi mein mar gaya

baaten karo

raat-bhar iqrar ki baaten karo
subh-dam inkar ki baaten karo
uljhanen dil ki badhani hon agar
gesu-e-khamdar ki baaten karo
hain nigahen sair aur abru kaman
yar ba-hathiyar ki baaten karo
mah-washo itne bure bhi hum nahin
aao hum se pyar ki baaten karo
sirf pahli hi ke din ai dosto
saz aur jhankar ki baaten karo
dusri ko bach gae paise agar
kucha-o-bazar ki baaten karo
das talak chilllar agar baqi rahe
chae par akhbar ki baaten karo
bis aur ikkis ko ahbab se
charkh-e-na-hanjar ki baaten karo
qarz-e-hasana le ke tum untis tak
ghar ke karobar ki baaten karo
tis ko baaten karo iktis ki
ya dil-e-bimar ki baaten karo
aakhiri din khub ghusse mein raho
hujjat-o-takrar ki baaten karo
phir usi shab subh ki ummid mein
mithi mithi pyar ki baaten karo
tum se ye kis ne kaha tha 'khwah-makhwah'
is tarah be-kar ki baaten karo

rangin jild

By

tum meri mazbut si diwar ho
mere kamzor palon ki jild si
tabhi har mausam se be-khauf bachaya hai use
jild sakht aur wahi rangin si rahe
pichhle baras yaad hai
kitni umas thi
hum galne se lage the aansuon se ya badle
mausam se
shayad donon se
jaanti hun jild ki fitrat
kasi bandhi pukhta kone rundne ke baad
bhi mazbut si
lekin ab safhe galne lage
be-waqt mausam se
sambhaal sako to mudai kar lo phir se
aksar purani jild nae safhon mein be-maani be-raunaq si malum hoti hai
safhe lugdi se gal jae kahin

naqab

By

musalsal gar ye guftugu ka silsila
jari rahta
to yaqinan tumhein mohabbat ho jati
abhi un se uns hua hi tha
ki talkhiyan nazar aane lagi
shayad wabasta the hum kabhi kahin
warna khudaya koi sabab to de meri
be-chainiyon ka
koi gila koi shikwa kuchh to kar
mohabbat na sahi yaqinan
par ye shire se ghule lahje ka
parda fash to kar

wirasat

By

dur kisi basti ki
nim-tarik kothari mein
ek tang chaarpai pe
karahat-zada kokh se
ghaib ki madad ko pukarti
aadhi chikh
pure jigar se par hui to
nannhi chalai
dil baith gae
man ufuq ke par
ja chuki thi
riwayat ki qabr mein
be-hisi ka kafan pahna ke
use tahzib se dafn kar diya gaya
aziyyat mein mubtala zehnon ko
qismat ki goli de kar
sula diya gaya
aur wo nau-maulud bachchi
apni janm-jali man se
nahin kah pai
dekh
wirasat tera khun pine ke baad
meri ek aur man
khojne nikal padi hai

mazhabi peshwa

By

khuda aur us ke insaf se darne wale
khata-posh kamzor dil
wajud aur na-wajud ka
munazra karne wale
shikariyon se behtar hain
ki un ke pas
khauf-zada hone ke liye
koi khuda
maujud nahin hota
wo mazhab ki musawat
tohfon se zarb de kar
maslahaton mein taqsim karte hain
aur farz kiye gae khuda ko
bhuk ka kulliya laga kar
sikke ke barabar le aate hain