din Dhala sham hui phul kahin lahrae

By

din dhala sham hui phul kahin lahrae
sanp yaadon ke mahakte hue dasne aae
wo kadi dhup ke din wo tapish-e-rah-e-wafa
wo sawad-e-shab-e-gesu ke ghanere sae
daulat-e-tab-e-sukhan-go hai amanat us ki
jab teri chashm-e-sukhan-saz talab farmae
justuju-e-gham-e-dauran ko khirad nikli thi
ki junun ne gham-e-jaanan ke khazine pae
sab mujhe mashwara-e-tark-e-wafa dete hain
un ka ima bhi ho shamil to maza aa jae
kya kahun dil ne kahan saint ke rakkha hai use
na kabhi bhulne paun na mujhe yaad aae
main ne hafiz ki tarah tai ye kiya hai 'abid'
baad-azin mai na khuram be-kaf-e-bazm-arae

dil ka moamla nigah-e-ashna ke sath

By

dil ka moamla nigah-e-ashna ke sath
aise hai jaise rabta-e-gul saba ke sath
dekho to pech-o-tab ki surat ki mil gai
sham-e-firaq bhi teri zulf-e-dota ke sath
ye kya bahaar hai ki dikhai gai mujhe
shoalon ki aanch bhi gul-e-rangin-qaba ke sath
ye kya tilism hai ki sunaya gaya mujhe
saz-e-shikast-e-dil teri aawaz-e-pa ke sath
ai dosto yahi hai qayamat ki roz-e-hashr
hum bhi jagae jaenge khalq-e-khuda ke sath
gulshan mein aai pairahan-e-rang ban gai
wo mauj-e-khun ki chehra-kusha thi hina ke sath
'abid' bayan-e-jalwa-nagah kya karun
khubi ada ke sath hai shokhi haya ke sath

dil hai aaina-e-hairat se do-chaar aaj ki raat

By

dil hai aaina-e-hairat se do-chaar aaj ki raat
gham-e-dauran mein hai aks-e-gham-e-yar aaj ki raat
koi mansur se ja kar ye kaho ham-nafaso
hun ba-tazir-e-khamoshi sar-e-dar aaj ki raat
gham ke mehwar pe hain thahre hue aflak-o-nujum
meri mahfil mein nahin waqt ko bar aaj ki raat
na makan aaj hai sabit na zaman hai sayyar
na khizan shoabada-ara na bahaar aaj ki raat
kabhi firdaus-e-gul-o-lala thi jo kisht-e-khayal
us se be-sakhta ugte hain sharar aaj ki raat
bu-e-khun aati hai sahra-e-tamanna se mujhe
khelta hun dil-e-wahshi ka shikar aaj ki raat
tujhe malum hai 'abid' ki bayaz dil par
nakhun-e-gham ne kiye naqsh-o-nigar aaj ki raat

chain paDta hai dil ko aaj na kal

By

chain padta hai dil ko aaj na kal
wahi uljhan ghadi ghadi pal pal
mera jina hai sej kanton ki
un ke marne ka nam taj-mahal
kya suhani ghata hai sawan ki
sanwari nar madh-bhari chanchal
na hua rafa mere dil ka ghubar
kaise kaise baras gae baadal
pyar ki ragni anokhi hai
us mein lagti hain sab suren komal
bin piye ankhdiyan nashili hain
nain kale hain tere bin kajal
mujhe dhoka hua ki jadu hai
panw bajte hain tere bin chhagal
lakh aandhi chale khayaban mein
muskuraate hain taqchon mein kanwal
lakh bijli gire gulistan mein
lahlahati hai shakh mein konpal
khil raha hai gulab dali par
jal rahi hai bahaar ki mashal
kohkan se mafar nahin koi
be-sutun ho kahin ki bindhiyachal
ek din pattharon ke bojh tale
khud-bakhud gir padenge raj-mahal
dam-e-rukhsat wo chup rahe 'abid'
aankh mein phailta gaya kajal

ye kya tilism hai duniya pe bar guzri hai

By

ye kya tilism hai duniya pe bar guzri hai
wo zindagi jo sar-e-rahguzar guzri hai
gulon ki gum-shudagi se suragh milta hai
kahin chaman se nasim-e-bahaar guzri hai
kahin sahar ka ujala hua hai ham-nafaso
ki mauj-e-barq sar-e-shakh-sar guzri hai
raha hai ye sar-e-shorida misl-e-shola buland
agarche mujh pe qayamat hazar guzri hai
ye hadisa bhi hua hai ki ishq-e-yar ki yaad
dayar-e-qalb se begana-war guzri hai
unhin ko arz-e-wafa ka tha ishtiyaq bahut
unhin ko arz-e-wafa na-gawar guzri hai
harim-e-shauq mahakta hai aaj tak 'abid'
yahan se nikhat-e-gesu-e-yar guzri hai

yahi tha waqf teri mahfil-e-tarab ke liye

By

yahi tha waqf teri mahfil-e-tarab ke liye
charagh-e-dil ki sulagta hai aaj sab ke liye
kabhi main jurat-e-izhaar-e-muddaa to karun
koi jawaz to ho lutf-e-be-sabab ke liye
ufuq se chand ki champa-kali ubharti hai
sajae jate hain zewar nigar-e-shab ke liye
tere gada ne bhi saghar ka nuqrai aanchal
kahin se mang liya dukhtar-e-enab ke liye
tamam umr ba-faiz-e-nigah-e-lala-rukhan
sanad raha hun ishaaraat-e-chashm-o-lab ke liye
chaman se phul ke dhoke mein chun liye shoale
kaf-e-wafa ke liye daman-e-talab ke liye
kahin jo pursish-e-ahwal par wo mail hon
ki hum ne dil ko sambhaala hua hai jab ke liye
mujhe khabar hai bahut se mata-e-zauq-e-nazar
dukan-e-kakul-o-rukhsar-o-chashm-o-lab ke liye
sitara subh ka raushan tha sham se 'abid'
yahi thi maut harifan-e-bazm-e-shab ke liye