hamare sanwle kun dekh kar ji mein jali jamun

hamare sanwle kun dekh kar ji mein jali jamun
laga phika sawad us ka nahin lagti bhali jamun
sarapa aaj namkini o narmi o gudazi sun
hua ye sanwla goya namak mein ki gali jamun
lage hai tursh zahir mein pe hai ye sanwla mitha
maze-dari mein hai goya ye misri ki dali jamun
tumhaare rang ki tamsil us kun dun to khul jawe
khushi sin sanwari ho kar ke koyal ki kali jamun
kya ram sanware nen 'abru' kun dekh kar pani
laga barsat ka mausam dekho yaro chali jamun

hum nin sajan suna hai us shoKH ke dahan hai

hum nin sajan suna hai us shokh ke dahan hai
lekin kabhu na dekha kita hai aur kahan hai
dhunda hazar to bhi tera nishan na paya
lashkar mein gul-rukhan ke teri masal kahan hai
ab tishnagi ka roza shayad khule hamara
sham o shafaq sajan ka missi o rang-e-pan hai
dil mein kiya hai dawa ankhiyan hui hain munkir
teri kamar ka jhagda in do ke darmiyan hai
rahta hun ai piyare qadmon tale tumhaare
jis rah aawte ho aajiz ka whin makan hai
tujh khatt-e-pusht-e-lab mein tis ka sukhan hua sabz
us ki zaban dahan mein manind-e-barg-e-pan hai
piri sin qad kaman hai har-chand 'abru' ka
is naujawan ki khatir dil ab talak kashan hai

gunahgaron ki uzr-KHwahi hamare sahib qubul kije

gunahgaron ki uzr-khwahi hamare sahib qubul kije
karam tumhaare ki kar tawaqqoa ye arz kite hain man lije
gharib aajiz jafa ke mare faqir be-kas gada tumhaare
so wen sitam sin maren bichaare agar jo un par karam na kije
pade hain hum bich mein bala ke karam karo waste khuda ke
hue hain bande teri raza ke jo kuchh ke haq mein hamare kije
bipat padi hai jinhon pe gham ki jigar mein aatish lagi alam ki
kahan hai taqat unhen sitam ki ki jin pe ita itab kije
hamare dil pe jo kuchh ki guzra tumhaare dil par agar ho zahir
tu kuchh ajab nahin pathar ki manind agar yatha dil ki sun pasije
agar gunah bhi jo kuchh hua hai ki jis sin ita zarar hua hai
to hum sin wo be-khabar hua hai dilon sin is kun bhulae dije
hue hain hum 'abru' nishane lage hain tane ke tir khane
tera bura ho are zamane bata tu is tarah kyun ki jije

garche is buniyaad-e-hasti ke anasir chaar hain

garche is buniyaad-e-hasti ke anasir chaar hain
lekin apne nist ho jaane mein sab na-chaar hain
dosti aur dushmani hai in butan ki ek si
chaar din hain mehrban to chaar din bezar hain
ji koi mansur ke jun jaan karte hain fida
we sipahi aashiqon ki fauj ke sardar hain
ye jo sajti hai katari-dar mashru ki izar
marne ke waqt aashiq ke nangi tarwar hain
dosti aur pyar ki baaton pe khuban ki na bhul
shokh hote hain nipat ayyar kis ke yar hain
jo nasha jwani ka utrega to khinchenge khumar
ab to khuban sab sharab-e-husn ke sarshaar hain
kis tarah chashmon seti jari na ho dariya-e-khun
thal na paira 'abru' hum war aur we par hain

gali akeli hai pyare andheri raaten hain

gali akeli hai pyare andheri raaten hain
agar milo to sajan sau tarah ki ghaten hain
butan sin mujh kun tu karta hai mana ai zahid
raha hun sun ki ye bhi khuda ki baaten hain
azal sin kyun ye abad ki taraf kun dauden hain
wo zulf dil ke talab ki magar baraaten hain
raqib ijz sin maqul ho sake hain kahin
ilaj un ka magar jhagden hain wa laten hain
karo karam ki nigahan taraf faqiron ki
nisab-e-husn ki sahab yahi zakaten hain
rahin falak ke sada her-pher mein namard
ye randiyan hain ki charkha hamesha katen hain
likhunga 'abru' ab khush-nayan kun main nama
palak qalam hain meri mardumuk dawaten hain