tajdid-e-riwayat-e-kuhan karte rahenge

tajdid-e-riwayat-e-kuhan karte rahenge
sar marka-e-dar-o-rasan karte rahenge
wo daur-e-khizan ho ki bahaaron ka zamana
hum yaad tujhe jaan-e-chaman karte rahenge
rangin tere zikr se hum sher o sukhan ko
ai jaan-e-sukhan markaz-e-fan karte rahenge
is aabla-pai pe bhi hum teri talab mein
tai jada-e-alam-o-mehan karte rahenge
duniya hamein diwana samajhti hai to samjhe
hum aam gham-e-dil ka chalan karte rahenge
jalte hain jise sun ke andhere ke parastar
hum aam wahi tarz-e-sukhan karte rahenge
gulshan mein na hum honge to phir sog hamara
gul-pairahan o ghuncha-dahan karte rahenge
'zahid' be-taqaza-e-wafa tarah-e-yaqin par
hum koshish-e-tamir-e-watan karte rahenge

qafas se chhuTne pe shad the hum ki lazzat-e-zindagi milegi

qafas se chhutne pe shad the hum ki lazzat-e-zindagi milegi
ye kya khabar thi bahaar-e-gulshan lahu mein dubi hui milegi
jin ahl-e-himmat ke raston mein bichhae jate hain aaj kante
unhi ke khun-e-jigar se rangin chaman ki har ek kali milegi
wo din bhi the jab andheri raaton mein bhi qadam rah-e-rast par the
aur aaj jab raushni mili hai to zist bhatki hui milegi
nai sahar ke hasin suraj tujhe gharibon se wasta kya
jahan ujala hai sim-o-zar ka wahin teri raushni milegi
kabhi to nasl-o-watan-parasti ki tirgi ko shikast hogi
kabhi to sham-e-alam mitegi kabhi to subh-e-khushi milegi
wo hum nahin hain ki sirf apne hi ghar mein shamen jala ke baithen
wahan wahan raushni karenge jahan jahan tirgi milegi
talash-e-manzil ka azm-e-mohkam dalil-e-manzil-rasi hai 'zahid'
qadam to apne badhao aage khuli hui rah bhi milegi

nai subh chahte hain nai sham chahte hain

nai subh chahte hain nai sham chahte hain
jo ye roz o shab badal de wo nizam chahte hain
wahi shah chahte hain jo ghulam chahte hain
koi chahta hi kab hai jo awam chahte hain
isi baat par hain barham ye sitamgaran-e-alam
ki jo chhin gaya hai hum se wo maqam chahte hain
kise harf-e-haq sunaun ki yahan to us ko sunna
na khawas chahte hain na awam chahte hain
ye nahin ki tu ne bheja hi nahin payam koi
magar ek wahi na aaya jo payam chahte hain
teri rah dekhti hain meri tishna-kaam aankhen
tere jalwe mere ghar ke dar-o-baam chahte hain
wo kitab-e-zindagi hi na hui murattab ab tak
ki hum intisab jis ka tere nam chahte hain
na murad hogi puri kabhi un shikariyon ki
mujhe dekhna jo 'zahid' tah-e-dam chahte hain