dilon ki or dhuan sa dikhai deta hai

By

dilon ki or dhuan sa dikhai deta hai
ye shahr to mujhe jalta dikhai deta hai
jahan ki dagh hai yan aage dard rahta tha
magar ye dagh bhi jata dikhai deta hai
pukarti hain bhare shahr ki guzargahen
wo roz sham ko tanha dikhai deta hai
ye log tuti hui kashtiyon mein sote hain
mere makan se dariya dikhai deta hai
khizan ke zard dinon ki siyah raaton mein
kisi ka phul sa chehra dikhai deta hai
kahin mile wo sar-e-rah to lipat jaen
bas ab to ek hi rasta dikhai deta hai

dil mein wo shor na aankhon mein wo nam rahta hai

By

dil mein wo shor na aankhon mein wo nam rahta hai
ab tap-e-hijr tawaqqo se bhi kam rahta hai
kabhi shoale se lapakte the mere sine mein
ab kisi waqt dhuan sa koi dam rahta hai
kya khuda jaane mere dil ko hua tere baad
na khushi is mein thaharti hai na gham rahta hai
rishta-e-tar-e-tamanna nahin tuta ab tak
ab bhi aankhon mein teri zulf ka kham rahta hai
chhod jati hai har ek rut koi khushbu koi rang
na sitam rahta hai baqi na karam rahta hai

dhaDakti rahti hai dil mein talab koi na koi

By

dhadakti rahti hai dil mein talab koi na koi
pukarta hai mujhe roz-o-shab koi na koi
shab-e-alam tere sada dilon pe kya guzri
sahar hui to sunaega sab koi na koi
zaban band hai aankhon ke band rahne tak
khulegi aankh to kholega lab koi na koi
hawa-e-saz-e-alam lakh ehtiyat kare
laraz hi uthta hai tar-e-tarab koi na koi
ghane banon mein bhi rasta nikal hi aata hai
bana hi deti hai qudrat sabab koi na koi

dast-e-sumum dast-e-saba kyun nahin hua

By

dast-e-sumum dast-e-saba kyun nahin hua
dar mausam-e-bahaar ka wa kyun nahin hua
zalim the wara-e-hisab-o-kitab kya
un par nuzul-e-qahr-e-khuda kyun nahin hua
un ke saron pe kyun nahin tutin qayamaten
an ke gharon mein hashr bapa kyun nahin hua
gunji na kyun falak se koi aayat-e-ghazab
ye gumbad-e-sukut sada kyun nahin hua
dil mein hain kis umid ke panje gade hue
ye mas nakhunon se juda kyun nahin hua

chhin gai teri tamanna bhi tamannai se

By

chhin gai teri tamanna bhi tamannai se
dil bahalte hain kahin hausla-afzai se
kaisa raushan tha tera nind mein duba chehra
jaise ubhra ho kisi khwab ki gahrai se
wahi aashufta-mizaji wahi khushiyan wahi gham
ishq ka kaam liya hum ne shanasai se
na kabhi aankh bhar aai na tera nam liya
bach ke chalte rahe har kucha-e-ruswai se
hijr ke dam se salamat hai tere wasl ki aas
tar-o-taza hai khushi gham ki tawanai se
khil ke murjha bhi gae fasl-e-mulaqat ke phul
hum hi farigh na hue mausam-e-tanhai se

chhaT gaya abr shafaq khul gai tare nikle

By

chhat gaya abr shafaq khul gai tare nikle
band kamron se tere dard ke mare nikle
shakh par pankhudiyan hon ki palak par aansu
tere daman ki jhalak dekh ke sare nikle
tu agar pas nahin hai kahin maujud to hai
tere hone se bade kaam hamare nikle
tere honton meri aankhon se na badli duniya
phir wahi phul khile phir wahi tare nikle
rah gai laj meri arz-e-wafa ki 'mushtaq'
khamushi se teri kya kya na ishaare nikle