machalti hai mere aaghosh mein KHushbu-e-yar ab tak

machalti hai mere aaghosh mein khushbu-e-yar ab tak
meri aankhon mein hai is sehr-e-rangin ka khumar ab tak
koi aata nahin ab dil ki basti mein magar phir bhi
umidon ke charaghon se hain raushan rahguzar ab tak
abhi tak nisf shab ko chandni gati hai jharnon mein
nahin badli shabab-e-muntazir ki yaadgar ab tak
jala rakkhe hain shahrahon pe ashkon ke diye kab se
nahin guzra kabhi is samt se wo shahsawar ab tak
shikast-e-arzu ko ishq ka anjam kyun samjhun
muqabil hai mere aaina-e-lail-o-nihaar ab tak

kahin wo meri mohabbat mein ghul raha hi na ho

kahin wo meri mohabbat mein ghul raha hi na ho
khuda kare use ye tajraba hua hi na ho
supurdagi mera mear to nahin lekin
main sochta hun tere rup mein khuda hi na ho
main tujh ko pa ke bhi kis shakhs ki talash mein hun
mere khayal mein koi tere siwa hi na ho
wo uzr kar ki mere dil ko bhi yaqin aae
wo git ga ki jo main ne kabhi suna hi na ho
wo baat kar jise phaila ke main ghazal kah lun
sunaun sher jo main ne abhi likha hi na ho
sahar ko dil ki taraf ye dhuan sa kaisa hai
kahin ye mera diya raat-bhar jala hi na ho
ho kaise jabr-e-mashiyat ko is dua ka lihaz
jo ek bar mile phir kabhi juda hi na ho
ye abr-o-kisht ki duniya mein kaise mumkin hai
ki umr-bhar ki wafa ka koi sila hi na ho
meri nigah mein wo ped bhi hai bad-kirdar
lada hua ho jo phal se magar jhuka hi na ho
jo dasht dasht se phulon ki bhik mangta tha
kahin wo tod ke kashkol mar gaya hi na ho
tulu-e-subh ne chamka diye hain abr ke chaak
'nadim' ye mera daman-e-muddaa hi na ho

gul tera rang chura lae hain gulzaron mein

gul tera rang chura lae hain gulzaron mein
jal raha hun bhari barsat ki bauchhaaron mein
mujh se katra ke nikal ja magar ai jaan-e-haya
dil ki lau dekh raha hun tere rukhsaron mein
husn-e-be-gana-e-ehsas-e-jamal achchha hai
ghunche khilte hain to bik jate hain bazaron mein
zikr karte hain tera mujh se ba-unwan-e-jafa
chaara-gar par piro lae hain talwaron mein
zakhm chhup sakte hain lekin mujhe fan ki saugand
gham ki daulat bhi hai shamil mere shahkaron mein
muntazir hain ki koi tesha-e-takhliq uthae
kitne asnam abhi dafan hain kohsaron mein
mujh ko nafrat se nahin pyar se maslub karo
main to shamil hun mohabbat ke gunahgaron mein

bazm-e-insan mein bhi ek raat basar kar dekho

bazm-e-insan mein bhi ek raat basar kar dekho
ek bar apni zamin par bhi utar kar dekho
is ufuq par na agar jannat-e-mauuda mili
is ufuq tak bhi jo chaho to safar kar dekho
koi dubi hui kashti hai ki sahil ka nishan
apni sochon ke samundar se ubhar kar dekho
khud ko dekho mere mear ke aaine mein
ek zara mujh pe ye ehsan bhi dhar kar dekho
mausam-e-gul hai to kirdar-e-chaman kyun badle
aag phulon ko to shabnam ko sharar kar dekho
har zamane mein bujhe to nahin rahte khurshed
gardisho aaj meri shab ko sahar kar dekho