kisi ko humse hain chand shikwe kisi ko behad shikayaten hain

By

kisi ko hum se hain chand shikwe kisi ko behad shikayaten hain
hamare hisse mein sirf apni safaiyan hain wazahaten hain
qadam qadam par badal rahe hain musafiron ki talab ke raste
hawaon jaisi mohabbaten hain sadaon jaisi rifaqaten hain
kisi ka maqruz main nahin par mere gareban pe hath sab ke
koi meri chahaton ka dushman kisi ko darkar chahaten hain
teri judai ke kitne suraj ufuq pe dube magar abhi tak
khalish hai sine mein pahle din si lahu main waisi hi wahshaten hain
meri mohabbat ke raaz-dan ne ye kah ke lauta diya mera khat
ki bhigi bhigi si aansuon mein tamam gunjalak ibaraten hain
main dusron ki khushi ki khatir ghubar ban kar bikhar gaya hun
magar kisi ne ye haq na mana ki meri bhi kuchh zaruraten hain

kaise kahin ki jaan se pyara nahin raha

By

kaise kahin ki jaan se pyara nahin raha
ye aur baat ab wo hamara nahin raha
aansu tere bhi khushk hue aur mere bhi
nam ab kisi nadi ka kinara nahin raha
kuchh din tumhaare laut ke aane ki aas thi
ab is ummid ka bhi sahaara nahin raha
raste mah-o-nujum ke tabdil ho gae
in khidkiyon mein ek bhi tara nahin raha
samjhe the dusron se bahut mukhtalif tujhe
kya man len ki tu bhi hamara nahin raha
hathon pe bujh gai hai muqaddar ki kahkashan
ya rakh ho gaya wo sitara nahin raha
tum eatibar us ke liye kyun udas ho
ek shakhs jo kabhi bhi tumhaara nahin raha

kaha din ko bhi ye ghar kis liye viran rahta hai

By

kaha din ko bhi ye ghar kis liye viran rahta hai
yahan kya hum sa koi be-sar-o-saman rahta hai
dar-o-diwar sannate ki chadar mein hain khwabida
bhala aisi jagah zinda koi insan rahta hai
musalsal puchhne par ek chilman se jawab aaya
yahan ek dil-shikasta sahab-e-diwan rahta hai
jhijak kar main ne puchha kya kabhi bahar nahin aata
jawab aaya use khalwat mein itminan rahta hai
kaha kya us ke rishta-dar bhi milne nahin aate
jawab aaya ye sahra raat-din sunsan rahta hai
kaha koi to hoga us ke dukh-sukh bantne wala
jawab aaya nahin khali ye ghar ye lawn rahta hai
kaha is ghar ke aangan mein hain kuchh phulon ke paude bhi
jawab aaya ki khali phir bhi har gul-dan rahta hai
kaha kya is mohalle mein nahin pursan-e-haal us ka
jawab aaya khayal us ka mujhe har aan rahta hai
khuda ka shukr hai hum ek faza mein sans lete hain
agar milte nahin itna to itminan rahta hai

kabhi tu ne KHud bhi socha ki ye pyas hai to kyun hai

By

kabhi tu ne khud bhi socha ki ye pyas hai to kyun hai
tujhe pa ke bhi mera dil jo udas hai to kyun hai
mujhe kyun aziz-tar hai ye dhuan dhuan sa mausam
ye hawa-e-sham-e-hijran mujhe ras hai to kyun hai
tujhe kho ke sochta hun mere daman-e-talab mein
koi khwab hai to kyun hai koi aas hai to kyun hai
main ujad ke bhi hun tera tu bichhad ke bhi hai mera
ye yaqin hai to kyun hai ye qayas hai to kyun hai
mere tan barahna-dushman isi gham mein ghul rahe hain
ki mere badan pe salim ye libas hai to kyun hai
kabhi puchh us ke dil se ki ye khush-mizaj shair
bahut apni shairi mein jo udas hai to kyun hai
tera kis ne dil bujhaya mere 'eatibar-sajid'
ye charagh-e-hijr ab tak tere pas hai to kyun hai

jo KHayal the na qayas the wahi log mujhse bichhaD gae

By

jo khayal the na qayas the wahi log mujh se bichhad gae
jo mohabbaton ki asas the wahi log mujh se bichhad gae
jinhen manta hi nahin ye dil wahi log mere hain ham-safar
mujhe har tarah se jo ras the wahi log mujh se bichhad gae
mujhe lamha-bhar ki rafaqaton ke sarab aur sataenge
meri umr-bhar ki jo pyas the wahi log mujh se bichhad gae
ye khayal sare hain aarzi ye gulab sare hain kaghzi
gul-e-arzu ki jo bas the wahi log mujh se bichhad gae
jinhen kar saka na qubul main wo sharik-e-rah-safar hue
jo meri talab meri aas the wahi log mujh se bichhad gae
meri dhadkanon ke qarib the meri chah the mera khwab the
wo jo roz-o-shab mere pas the wahi log mujh se bichhad gae

dil hain yun muztarib makanon mein

By

dil hain yun muztarib makanon mein
machhliyan jaise martabanon mein
dhup se dhundte hain rah-e-farar
log shishe ke saebanon mein
be-irada kalam ki khwahish
be-sabab luknaten zabanon mein
teri aamad pe jaise laut aaya
waqt guzre hue zamanon mein
dil dhadakta hai har sitare ka
aaj ki raat aasmanon mein
zang-alud ho gae jazbi
jam gae harf sard-khanon mein
reshmi log dhundte hain hum
shahr ke aahani makanon mein