wahi hai wahshat wahi hai nafrat aaKHir is ka kya hai sabab

wahi hai wahshat wahi hai nafrat aakhir is ka kya hai sabab
insan insan bahut rata hai insan insan banega kab
wed upnishad purze purze gita quran waraq waraq
ram-o-kirishn-o-gautam-o-yazdan zakhm-rasida sab ke sab
ab tak aisa mila na koi dil ki pyas bujhata jo
yun mai-khana-chashm bahut hain bahut hain yun to saqi-lab
jis ki tegh hai duniya us ki jis ki lathi us ki bhains
sab qatil hain sab maqtul hain sab mazlum hain zalim sab
khanjar khanjar qatil abru dilbar hath masiha hont
lahu lahu hai sham-e-tamanna aansu aansu subh-e-tarab
dekhen din phirte hain kab tak dekhen phir kab milte hain
dil se dil aankhon se aankhen hath se hath aur lab se lab
zakhmi sarhad zakhmi qaumen zakhmi insan zakhmi mulk
harf-e-haq ki salib uthae koi masih to aae ab

uljhe kanTon se ki khele gul-e-tar se pahle

uljhe kanton se ki khele gul-e-tar se pahle
fikr ye hai ki saba aae kidhar se pahle
jam-o-paimana-o-saqi ka guman tha lekin
dida-e-tar hi tha yan dida-e-tar se pahle
abr-e-naisan ki na barakat hai na faizan-e-bahaar
qatre gum ho gae tamir-e-guhar se pahle
jam gaya dil mein lahu sukh gae aankhon mein ashk
tham gaya dard-e-jigar rang-e-sahar se pahle
qafile aae to the naron ke parcham le kar
sar-nigun ho gai har aah asar se pahle
khun-e-sar bah gaya maut aa gai diwanon ko
barish-e-sang se tufan-e-sharar se pahle
surkhi-e-khun-e-tamanna ki mahak aati hai
dil koi tuta hai shayad gul-e-tar se pahle
maqtal-e-shauq ke aadab nirale hain bahut
dil bhi qatil ko diya karte hain sar se pahle

tumhaare eajaz-e-husn ki mere dil pe lakhon inayaten hain

tumhaare eajaz-e-husn ki mere dil pe lakhon inayaten hain
tumhaari hi den mere zauq-e-nazar ki sari latafaten hain
jawan hai suraj jabin pe jis ke tumhaare mathe ki raushni hai
sahar hasin hai ki us ke rukh par tumhaare rukh ki sabahaten hain
main jin bahaaron ki parwarish kar raha hun zindan-e-gham mein hamdam
kisi ke gesu-o-chashm-o-rukhsar-o-lab ki rangin hikayaten hain
na jaane chhalkae jam kitne na jaane kitne subu uchhaale
magar meri tishnagi ki ab bhi teri nazar se shikayaten hain
main apni aankhon mein sail-e-ashk-e-rawan nahin bijliyan liye hun
jo sar-buland aur ghayur hain ahl-e-gham ye un ki riwayaten hain
main raat ki god mein sitare nahin sharare bikherta hun
sahar ke dil mein jo apne ashkon se bo raha hun baghawaten hain
ye shairi-e-nau ki paighambari zamane ki dawari hai
labon pe mere sahifa-e-inqilab ki surkh aayaten hain

sitaron ke payam aae bahaaron ke salam aae

sitaron ke payam aae bahaaron ke salam aae
hazaron nama-ha-e-shauq ahl-e-dil ke kaam aae
na jaane kitni nazren us dil-e-wahshi pe padti hain
har ek ko fikr hai us ki ye shahin zer-e-dam aae
isi ummid mein betabi-e-jaan badhti jati hai
sukun-e-dil jahan mumkin ho shayad wo maqam aae
hamari tishnagi bujhti nahin shabnam ke qatron se
jise saqi-gari ki sharm ho aatish-ba-jam aae
koi shayad hamare dagh-e-dil ki tarah raushan ho
hazaron aaftab is shauq mein baala-e-baam aae
inhen rahon mein shaikh-o-muhtasib hail rahe akasr
inhen rahon mein huran-e-bahishti ke khiyam aae
nigahen muntazir hain ek khurshid-e-tamanna ki
abhi tak jitne mehr-o-mah aae na-tamam aae
ye aalam lazzat-e-takhliq ka hai raqs-e-lafani
tasawwur-khana-e-hairat mein lakhon subh-o-sham aae
koi 'sardar' kab tha is se pahle teri mahfil mein
bahut ahl-e-sukhan utthe bahut ahl-e-kalam aae

shabon ki zulf ki ru-e-sahar ki KHair manao

shabon ki zulf ki ru-e-sahar ki khair manao
nigar-e-shams urus-e-qamar ki khair manao
sipah-e-dushman-e-insaniyat qarib aai
dayar-e-husn sar-e-rahguzar ki khair manao
abhi to auron ke diwar-o-dar pe yurish thi
ab apne saya-e-diwar-o-dar ki khair manao
chali hai aatish-o-ahan ke dil se baad-e-sumum
chaman ke jalwa-e-gul-ha-e-tar ki khair manao
guzar na jae kahin bahr-o-bar se khun ki dhaar
farogh-e-shabnam-o-ab-o-guhar ki khair manao
ye nafa-khoron ki danish-farosh duniya hai
mata-e-ilm ki jins-e-hunar ki khair manao
mere liye hai meri muflisi-o-napaki
tum apni paki-e-qalb-o-nazar ki khair manao

sard hain dil aatish-e-ru-e-nigaran chahiye

sard hain dil aatish-e-ru-e-nigaran chahiye
shoala-rang-e-bahaar-e-gul-ezaran chahiye
manzil-e-ishq-o-junun ke fasle hain sar-ba-kaf
in kathin rahon mein lutf-e-dast-e-yaran chahiye
kat rahi hai aur kat chukti nahin fasl-e-khizan
tez-tar ek aur tegh-e-nau-bahaaran chahiye
aaj mai-khane mein sehr-e-chashm-e-saqi ke liye
iltifat-e-chashm mast-e-mai-gusaran chahiye
is dil-e-wahshi ki aazadi ka kya kije ilaj
ek kamand-e-gesu-e-yazdan-shikaran chahiye
naghma ban jata hai nala un ki bazm-e-naz mein
un ko khush rakhne ko shor-e-sogwaran chahiye
aasmanon se baraste hain zamin par regzar
aaj phir 'sardar' raqs-e-barq-o-baran chahiye