dil-e-bedar faruqi dil-e-bedar karrari

By

dil-e-bedar faruqi dil-e-bedar karrari
mis-e-adam ke haq mein kimiya hai dil ki bedari
dil-e-bedar paida kar ki dil khwabida hai jab tak
na teri zarb hai kari na meri zarb hai kari
masham-e-tez se milta hai sahra mein nishan us ka
zan o takhmin se hath aata nahin aahu-e-tatari
is andeshe se zabt-e-ah main karta rahun kab tak
ki mugh-zade na le jaen teri qismat ki chingari
khudawanda ye tere sada-dil bande kidhar jaen
ki darweshi bhi ayyari hai sultani bhi ayyari
mujhe tahzib-e-hazir ne ata ki hai wo aazadi
ki zahir mein to aazadi hai baatin mein giraftari
tu ai maula-e-yasrib aap meri chaarasazi kar
meri danish hai afrangi mera iman hai zunnari

digar-gun hai jahan taron ki gardish tez hai saqi

By

digar-gun hai jahan taron ki gardish tez hai saqi
dil-e-har-zarra mein ghaugha-e-rusta-khez hai saqi
mata-e-din-o-danish lut gai allah-walon ki
ye kis kafir-ada ka ghamza-e-khun-rez hai saqi
wahi derina bimari wahi na-mohkami dil ki
ilaj is ka wahi aab-e-nashat-angez hai saqi
haram ke dil mein soz-e-arzu paida nahin hota
ki paidai teri ab tak hijab-amez hai saqi
na uttha phir koi 'rumi' ajam ke lala-zaron se
wahi aab-o-gil-e-iran wahi tabrez hai saqi
nahin hai na-umid 'iqbaal' apni kisht-e-viran se
zara nam ho to ye mitti bahut zarkhez hai saqi
faqir-e-rah ko bakhshe gae asrar-e-sultani
baha meri nawa ki daulat-e-parwez hai saqi

asar kare na kare sun to le meri fariyaad

By

asar kare na kare sun to le meri fariyaad
nahin hai dad ka talib ye banda-e-azad
ye musht-e-khak ye sarsar ye wusat-e-aflak
karam hai ya ki sitam teri lazzat-e-ijad
thahar saka na hawa-e-chaman mein khema-e-gul
yahi hai fasl-e-bahaari yahi hai baad-e-murad
qusur-war gharib-ud-dayar hun lekin
tera kharaba farishte na kar sake aabaad
meri jafa-talabi ko duaen deta hai
wo dasht-e-sada wo tera jahan-e-be-buniyaad
khatar-pasand tabiat ko sazgar nahin
wo gulsitan ki jahan ghat mein na ho sayyaad
maqam-e-shauq tere qudsiyon ke bas ka nahin
unhin ka kaam hai ye jin ke hausle hain ziyaad

amin-e-raaz hai mardan-e-hur ki darweshi

By

amin-e-raaz hai mardan-e-hur ki darweshi
ki jibrail se hai us ko nisbat-e-khweshi
kise khabar ki safine dubo chuki kitne
faqih o sufi o shair ki na-khush-andeshi
nigah-e-garm ki sheron ke jis se hosh ud jaen
na aah-e-sard ki hai gosfandi o meshi
tabib-e-ishq ne dekha mujhe to farmaya
tera maraz hai faqat aarzu ki be-nishi
wo shai kuchh aur hai kahte hain jaan-e-pak jise
ye rang o nam ye lahu aab o nan ki hai beshi

aflak se aata hai nalon ka jawab aaKHir

By

aflak se aata hai nalon ka jawab aakhir
karte hain khitab aakhir uthte hain hijab aakhir
ahwal-e-mohabbat mein kuchh farq nahin aisa
soz o tab-o-tab awwal soz o tab-o-tab aakhir
main tujh ko batata hun taqdir-e-umam kya hai
shamshir-o-sinan awwal taus-o-raubab aakhir
mai-khana-e-europe ke dastur nirale hain
late hain surur awwal dete hain sharab aakhir
kya dabdaba-e-nadir kya shaukat-e-taimuri
ho jate hain sab daftar gharq-e-mai-e-nab aakhir
khalwat ki ghadi guzri jalwat ki ghadi aai
chhutne ko hai bijli se aaghosh-e-sahab aakhir
tha zabt bahut mushkil is sail-e-maani ka
kah dale qalandar ne asrar-e-kitab aakhir

aalam-e-ab-o-KHak-o-baad sirr-e-ayan hai tu ki main

By

aalam-e-ab-o-khak-o-baad sirr-e-ayan hai tu ki main
wo jo nazar se hai nihan us ka jahan hai tu ki main
wo shab-e-dard-o-soz-o-gham kahte hain zindagi jise
us ki sahar hai tu ki main us ki azan hai tu ki main
kis ki numud ke liye sham o sahar hain garm-e-sair
shana-e-rozgar par bar-e-giran hai tu ki main
tu kaf-e-khak o be-basar main kaf-e-khak o khud-nigar
kisht-e-wajud ke liye aab-e-rawan hai tu ki main