zauq o shauq

By

qalb o nazar ki zindagi dasht mein subh ka saman
chashma-e-aftab se nur ki naddiyan rawan!
husn-e-azal ki hai numud chaak hai parda-e-wajud
dil ke liye hazar sud ek nigah ka ziyan!
surkh o kabud badliyan chhod gaya sahab-e-shab!
koh-e-izam ko de gaya rang-ba-rang tailisan!
gard se pak hai hawa barg-e-nakhil dhul gae
reg-e-nawah-e-kazima narm hai misl-e-parniyan
aag bujhi hui idhar, tuti hui tanab udhar
kya khabar is maqam se guzre hain kitne karwan
aai sada-e-jibrail tera maqam hai yahi
ahl-e-firaq ke liye aish-e-dawam hai yahi
kis se kahun ki zahr hai mere liye mai-e-hayat
kohna hai baz-e-kainat taza hain mere wardat!
kya nahin aur ghaznawi kargah-e-hayat mein
baithe hain kab se muntazir ahl-e-haram ke somnat!
zikr-e-arab ke soz mein, fikr-e-ajam ke saz mein
ne arabi mushahidat, ne ajami takhaiyyulat
qafila-e-hijaz mein ek husain bhi nahin
garche hai tab-dar abhi gesu-e-dajla-o-furaat!
aql o dil o nigah ka murshid-e-awwalin hai ishq
ishq na ho to shar-o-din butkada-e-tasawwuraat!
sidq-e-khalil bhi hai ishq sabr-e-husain bhi hai ishq!
marka-e-wajud mein badr o hunain bhi hai ishq!
aaya-e-kaenat ka mani-e-der-yab tu!
nikle teri talash mein qafila-ha-e-rang-o-bu!
jalwatiyan-e-madrasa kor-nigah o murda-zauq
jalwatyan-e-maikada kam-talab o tahi-kadu!
main ki meri ghazal mein hai aatish-e-rafta ka suragh
meri tamam sarguzisht khoe huon ki justuju!
baad-e-saba ki mauj se nash-o-numa-e-khar-o-khas!
mere nafas ki mauj se nashw-o-numa-e-arzu!
khun-e-dil o jigar se hai meri nawa ki parwarish
hai rag-e-saz mein rawan sahib-e-saz ka lahu!
fursat-e-kashmukash mein in dil be-qarar ra
yak do shikan zyaada kun gesu-e-tabdar ra
lauh bhi tu, qalam bhi tu, tera wajud al-kitab!
gumbad-e-abgina-rang tere muhit mein habab!
aalam-e-ab-o-khak mein tere zuhur se farogh
zarra-e-reg ko diya tu ne tulu-e-aftab!
shaukat-e-sanjar-o-salim tere jalal ki numud!
faqr-e-'juned'-o-'bayazid' tera jamal be-naqab!
shauq tera agar na ho meri namaz ka imam
mera qayam bhi hijab! mera sujud bhi hijab!
teri nigah-e-naz se donon murad pa gae
aql, ghayab o justuju ishq, huzur o iztirab!
tira-o-tar hai jahan gardish-e-aftab se!
tab-e-zamana taza kar jalwa-e-be-hijab se!
teri nazar mein hain tamam mere guzishta roz o shab
mujh ko khabar na thi ki hai ilm-e-nakhil be-rutab!
taza mere zamir mein marka-e-kuhan hua!
ishq tamam mustafa! aql tamam bu-lahab!
gah ba-hila mi-barad, gah ba-zor mi-kashad
ishq ki ibtida ajab ishq ki intiha ajab!
aalam-e-soz-o-saz mein wasl se badh ke hai firaq
wasl mein marg-e-arzu! hijr mein lazzat-e-talab!
ain-e-visal mein mujhe hausla-e-nazar na tha
garche bahana-ju rahi meri nigah-e-be-adab!
garmi-e-arzu firaq! shorish-e-ha-o-hu firaq!
mauj ki justuju firaq! qatre ki aabru firaq!

tarana-e-milli

By

chin-o-arab hamara hindostan hamara
muslim hain hum watan hai sara jahan hamara
tauhid ki amanat sinon mein hai hamare
aasan nahin mitana nam-o-nishan hamara
duniya ke but-kadon mein pahla wo ghar khuda ka
hum is ke pasban hain wo pasban hamara
teghon ke sae mein hum pal kar jawan hue hain
khanjar hilal ka hai qaumi nishan hamara
maghrib ki wadiyon mein gunji azan hamari
thamta na tha kisi se sail-e-rawan hamara
baatil se dabne wale ai aasman nahin hum
sau bar kar chuka hai tu imtihan hamara
ai gulistan-e-undulus wo din hain yaad tujh ko
tha teri daliyon mein jab aashiyan hamara
ai mauj-e-dajla tu bhi pahchanti hai hum ko
ab tak hai tera dariya afsana-khwan hamara
ai arz-e-pak teri hurmat pe kat mare hum
hai khun teri ragon mein ab tak rawan hamara
salar-e-karwan hai mir-e-hijaz apna
is nam se hai baqi aaram-e-jaan hamara
'iqbaal' ka tarana bang-e-dara hai goya
hota hai jada-paima phir karwan hamara

shua-e-ummid

By

suraj ne diya apni shuaon ko ye paigham
duniya hai ajab chiz kabhi subh kabhi sham
muddat se tum aawara ho pahna-e-faza mein
badhti hi chali jati hai be-mehri-e-ayyam
ne ret ke zarron pe chamakne mein hai rahat
ne misl-e-saba tauf-e-gul-o-lala mein aaram
phir mere tajalli-kada-e-dil mein sama jao
chhodo chamanistan o bayaban o dar-o-baam

ruh-e-arzi aadam ka istiqbaal karti hai

By

khol aankh zamin dekh falak dekh faza dekh!
mashriq se ubharte hue suraj ko zara dekh!
is jalwa-e-be-parda ko parda mein chhupa dekh!
ayyam-e-judai ke sitam dekh jafa dekh!
betab na ho marka-e-bim-o-raja dekh!
hain tere tasarruf mein ye baadal ye ghataen
ye gumbad-e-aflak ye khamosh fazaen
ye koh ye sahra ye samundar ye hawaen
thin pesh-e-nazar kal to farishton ki adaen
aaina-e-ayyam mein aaj apni ada dekh!
samjhega zamana teri aankhon ke ishaare!
dekhenge tujhe dur se gardun ke sitare!
napaid tere bahr-e-takhayyul ke kinare
pahunchenge falak tak teri aahon ke sharare
tamir-e-khudi kar asar-e-ah-e-rasa dekh
khurshid-e-jahan-tab ki zau tere sharar mein
aabaad hai ek taza jahan tere hunar mein
jachte nahin bakhshe hue firdaus nazar mein
jannat teri pinhan hai tere khun-e-jigar mein
ai paikar-e-gul koshish-e-paiham ki jaza dekh!
nalanda tere ud ka har tar azal se
tu jins-e-mohabbat ka kharidar azal se
tu pir-e-sanam-khana-e-asrar azal se
mehnat-kash o khun-rez o kam-azar azal se
hai rakib-e-taqdir-e-jahan teri raza dekh!

ram

By

labrez hai sharab-e-haqiqat se jam-e-hind
sab falsafi hain khitta-e-maghrib ke ram-e-hind
ye hindiyon ki fikr-e-falak-ras ka hai asar
rifat mein aasman se bhi uncha hai baam-e-hind
is des mein hue hain hazaron malak-sarisht
mashhur jin ke dam se hai duniya mein nam-e-hind
hai ram ke wajud pe hindostan ko naz
ahl-e-nazar samajhte hain is ko imam-e-hind
ejaz is charagh-e-hidayat ka hai yahi
raushan-tar-az-sahar hai zamane mein sham-e-hind
talwar ka dhani tha shujaat mein fard tha
pakizgi mein josh-e-mohabbat mein fard tha

naya shiwala

By

sach kah dun ai barhaman gar tu bura na mane
tere sanam-kadon ke but ho gae purane
apnon se bair rakhna tu ne buton se sikha
jang-o-jadal sikhaya waiz ko bhi khuda ne
tang aa ke main ne aakhir dair o haram ko chhoda
waiz ka waz chhoda chhode tere fasane
patthar ki muraton mein samjha hai tu khuda hai
khak-e-watan ka mujh ko har zarra dewta hai
aa ghairiyat ke parde ek bar phir utha den
bichhdon ko phir mila den naqsh-e-dui mita den
suni padi hui hai muddat se dil ki basti
aa ek naya shiwala is des mein bana den
duniya ke tirathon se uncha ho apna tirath
daman-e-asman se is ka kalas mila den
har subh uth ke gaen mantar wo mithe mithe
sare pujariyon ko mai pit ki pila den
shakti bhi shanti bhi bhagton ke git mein hai
dharti ke basiyon ki mukti prit mein hai