dil-e-KHun-gashta-e-jafa pe kahin

dil-e-khun-gashta-e-jafa pe kahin
ab karam bhi garan na ho jae
tere bimar ka khuda-hafiz
nazr-e-chaara-garan na ho jae
ishq kya kya na aafaten dhae
husn gar mehrban na ho jae
mai ke aage ghamon ka koh-e-giran
ek pal mein dhuan na ho jae
phir 'majaz' in dinon ye khatra hai
dil halak-e-butan na ho jae

dard ki daulat-e-bedar ata ho saqi

dard ki daulat-e-bedar ata ho saqi
hum bahi-khwah sabhi ke hain bhala ho saqi
sakht-jaan hi nahin hum khud-sar-o-khuddar bhi hain
nawak-e-naz khata hai to khata ho saqi
sai-e-tadbir mein muzmar hai ek aah-e-jaan-soz
us ka inam saza ho ki jaza ho saqi
sina-e-shauq mein wo zakhm ki lau de utthe
aur bhi tez zamane ki hawa ho saqi

dhuan sa ek samt uTh raha hai sharare uD uD ke aa rahe hain

dhuan sa ek samt uth raha hai sharare ud ud ke aa rahe hain
ye kis ki aahen ye kis ke nale tamam aalam pe chha rahe hain
naqab rukh se utha chuke hain khade hue muskura rahe hain
main hairati-e-azal hun ab bhi wo khak hairan bana rahe hain
hawaen be-khud fazaen be-khud ye ambar-afshan ghataen be-khud
mizha ne chheda hai saz dil ka wo zer-e-lab gunguna rahe hain
ye shauq ki wardat-e-paiham ye wada-e-iltifat-e-paiham
kahan kahan aazma chuke hain kahan kahan aazma rahe hain
surahiyan nau-ba-nau hain ab bhi jamahiyan nau-ba-nau hain ab bhi
magar wo pahlu-tahi ki saugand ab bhi nazdik aa rahe hain
wo ishq ki wahshaton ki zad mein wo taj ki rifaton ke aage
magar abhi aazma rahe hain magar abhi aazma rahe hain
ata kiya hai 'majaz' fitrat ne wo mazaq-e-latif hum ko
ki aalam-e-ab-o-gil se hat kar ek aur aalam bana rahe hain

daman-e-dil pe nahin barish-e-ilham abhi

daman-e-dil pe nahin barish-e-ilham abhi
ishq na-pukhta abhi jazb-e-darun kham abhi
khud hi jhukta hun ki dawa-e-junun kya kijiye
kuchh gawara bhi hai ye qaid-e-dar-o-baam abhi
ye jawani to abhi mail-e-paikar nahin
ye jawani to hai ruswa-e-mai-o-jam abhi
waiz o shaikh ne sar jod ke badnam kiya
warna badnam na hoti mai-e-gulfam abhi
main ba-sad-fakhriya zuhhad se kahta hun 'majaz'
mujh ko hasil, sharf-e-baiat-e-khayyam abhi

bas is taqsir par apne muqaddar mein hai mar jaana

bas is taqsir par apne muqaddar mein hai mar jaana
tabassum ko tabassum kyun nazar ko kyun nazar jaana
khirad walon se husn o ishq ki tanqid kya hogi
na afsun-e-nigah samjha na andaz-e-nazar jaana
mai-e-gulfam bhi hai saz-e-ishrat bhi hai saqi bhi
bahut mushkil hai aashob-e-haqiqat se guzar jaana
gham-e-dauran mein guzri jis qadar guzri jahan guzri
aur is par lutf ye hai zindagi ko mukhtasar jaana

barbaad-e-tamanna pe itab aur ziyaada

barbaad-e-tamanna pe itab aur ziyaada
han meri mohabbat ka jawab aur ziyaada
roen na abhi ahl-e-nazar haal pe mere
hona hai abhi mujh ko kharab aur ziyaada
aawara o majnun hi pe mauquf nahin kuchh
milne hain abhi mujh ko khitab aur ziyaada
utthenge abhi aur bhi tufan mere dil se
dekhunga abhi ishq ke khwab aur ziyaada
tapkega lahu aur mere dida-e-tar se
dhadkega dil-e-khana-kharab aur ziyaada
hogi meri baaton se unhen aur bhi hairat
aaega unhen mujh se hijab aur ziyaada
use mutrib-e-bebak koi aur bhi naghma
ai saqi-e-fayyaz sharab aur ziyaada