unhen ye fikr hai har dam nai tarz-e-jafa kya hai

unhen ye fikr hai har dam nai tarz-e-jafa kya hai
hamein ye shauq hai dekhen sitam ki intiha kya hai
gunah-garon mein shamil hain gunahon se nahin waqif
saza ko jaante hain hum khuda jaane khata kya hai
ye rang-e-be-kasi rang-e-junun ban jaega ghafil
samajh le yas-o-hirman ke maraz ki intiha kya hai
naya bismil hun main waqif nahin rasm-e-shahadat se
bata de tu hi ai zalim tadapne ki ada kya hai
chamakta hai shahidon ka lahu parde mein qudrat ke
shafaq ka husn kya hai shokhi-e-rang-e-hina kya hai
umiden mil gain mitti mein daur-e-zabt-e-akhir hai
sada-e-ghaib batla de hamein hukm-e-khuda kya hai

nae jhagDe nirali kawishen ijad karte hain

nae jhagde nirali kawishen ijad karte hain
watan ki aabru ahl-e-watan barbaad karte hain
hawa mein ud ke sair-e-alam-e-ijad karte hain
farishte dang hain wo kaam aadam-zad karte hain
naya maslak naya rang-e-sukhan ijad karte hain
urus-e-sher ko hum qaid se aazad karte hain
mata-e-pas-e-ghairat bul-hawas barbaad karte hain
lab-e-khamosh ko sharminda-e-faryaad karte hain
hawa-e-taza pa kar bostan ko yaad karte hain
asiran-e-qafas waqt-e-sahar fariyaad karte hain
zara ai kunj-e-marqad yaad rakhna us hamiyyat ko
ki ghar viran kar ke hum tujhe aabaad karte hain
har ek khisht-e-kuhan afsana-e-derina kahti hai
zaban-e-haal se tute khandar fariyaad karte hain
bala-e-jaan hain ye tasbih aur zunnar ke phande
dil-e-haq-bin ko hum is qaid se aazad karte hain
azan dete hain but-khane mein ja kar shan-e-momin se
haram ke nara-e-naqus hum ijad karte hain
nikal kar apne qalib se naya qalib basaegi
asiri ke liye hum ruh ko aazad karte hain
mohabbat ke chaman mein majma-e-ahbab rahta hai
nai jannat isi duniya mein hum aabaad karte hain
nahin ghatti meri aankhon mein tariki shab-e-gham ki
ye tare raushni apni abas barbaad karte hain
thake-mande musafir zulmat-e-sham-e-ghariban mein
bahaar-e-jalwa-e-subh-e-watan ko yaad karte hain
dil-e-nashad rota hai zaban uf kar nahin sakti
koi sunta nahin yun be-nawa fariyaad karte hain
janab-e-shaikh ko ye mashq hai yaad-e-ilahi ki
khabar hoti nahin dil ko zaban se yaad karte hain
nazar aati hai duniya ek ibaadat-gah-e-nurani
sahar ka waqt hai bande khuda ko yaad karte hain
sabaq umr-e-rawan ka dil-nashin hone nahin pata
hamesha bhulte jate hain jo kuchh yaad karte hain
zamane ka moallim imtihan un ka nahin karta
jo aankhen khol kar ye dars-e-hasti yaad karte hain
adab talim ka jauhar hai zewar hai jawani ka
wahi shagird hain jo khidmat-e-ustad karte hain
na jaani qadr teri umr-e-rafta hum ne collage mein
nikal aate hain aansu ab tujhe jab yaad karte hain

na koi dost dushman ho sharik-dard-o-gham mera

na koi dost dushman ho sharik-dard-o-gham mera
salamat meri gardan par rahe bar-e-alam mera
likha ye dawar-e-mahshar ne meri fard-e-isyan par
ye wo banda hai jis par naz karta hai karam mera
kaha ghuncha ne hans kar wah kya nairang-e-alam hai
wajud gul jise samjhe hain sab hai wo adam mera
kashakash hai ummid-o-yas ki ye zindagi kya hai
ilahi aisi hasti se to achchha tha adam mera
dil-e-ahbab mein ghar hai shagufta rahti hai khatir
yahi jannat hai meri aur yahi bagh-e-iram mera
mujhe ahbab ki pursish ki ghairat mar dalegi
qayamat hai agar ifsha hua raaz-e-alam mera
khadi thin rasta roke hue lakhon tamannaen
shahid-e-yas hun nikla hai kis mushkil se dam mera
khuda ne ilm bakhsha hai adab ahbab karte hain
yahi daulat hai meri aur yahi jah-o-hasham mera
zaban-e-haal se ye lucknow ki khak kahti hai
mitaya gardish-e-aflak ne jah-o-hasham mera
kiya hai fash parda kufr-o-din ka is qadar main ne
ki dushman hai barhaman aur adu shaikh-e-haram mera

kuchh aisa pas-e-ghairat uTh gaya is ahd-e-pur-fan mein

kuchh aisa pas-e-ghairat uth gaya is ahd-e-pur-fan mein
ki zewar ho gaya tauq-e-ghulami apni gardan mein
shajar sakte mein hain khamosh hain bulbul nasheman mein
sidhaara qafila phulon ka sannata hai gulshan mein
garan thi dhup aur shabnam bhi jin paudon ko gulshan mein
teri qudrat se wo phule-phale sahra ke daman mein
hawa-e-taza dil ko khud-bakhud bechain karti hai
qafas mein kah gaya koi bahaar aai hai gulshan mein
mitana tha use bhi jazba-e-shauq-e-fana tujh ko
nishan-e-qabr-e-majnun dagh hai sahra ke daman mein
zamana mein nahin ahl-e-hunar ka qadar-dan baqi
nahin to saikdon moti hain is dariya ke daman mein
yahan tasbih ka halqa wahan zunnar ka phanda
asiri lazmi hai mazhab-e-shaikh-o-barahman mein
jinhen sincha tha khun-e-dil se agle baghbanon ne
taraste ab hain pani ko wo paude mere gulshan mein
dikhaya moajiza husn-e-bashar ka dast-e-qudrat ne
bhari tasir taswir-e-gili ke rang-o-roghan mein
shahid-e-yas hun ruswa hun nakaami ke hathon se
jigar ka chaak badh kar aa gaya hai mere daman mein
jahan mein rah ke yun qaem hun apni be-sabaati par
ki jaise aks-e-gul rahta hai aab-e-ju-e-gulshan mein
sharab-e-husn ko kuchh aur hi tasir deta hai
jawani ke numu se be-khabar hona ladakpan mein
shabab aaya hai paida rang hai rukhsar-e-nazuk se
farogh-e-husn kahta hai sahar hoti hai gulshan mein
nahin hota hai muhtaj-e-numaish faiz shabnam ka
andheri raat mein moti luta jati hai gulshan mein
mata-e-dard-e-dil ek daulat-e-bedar hai mujh ko
dur-e-shahwar hain ashk-e-mohabbat mere daman mein
na batlai kisi ne bhi haqiqat raaz-e-hasti ki
buton se ja ke sar phoda bahut dair-e-barahman mein
purani kawishen dair-o-haram ki mitti jati hai
nai tahzib ke jhagde hain ab shaikh-o-barahman mein
uda kar le gai baad-e-khizan is sal us ko bhi
raha tha ek barg-e-zard baqi mere gulshan mein
watan ki khak se mar kar bhi hum ko uns baqi hai
maza daman-e-madar ka hai is mitti ke daman mein

hum sochte hain raat mein taron ko dekh kar

hum sochte hain raat mein taron ko dekh kar
shamen zamin ki hain jo dagh aasman ke hain
jannat mein khak baada-paraston ka dil lage
naqshe nazar mein sohbat pir-e-mughan ke hain
apna maqam shakh-e-burida hai bagh mein
gul hain magar satae hue baghban ke hain
ek silsila hawas ka hai insan ki zindagi
is ek musht-e-khak ko gham do-jahan ke hain

fana ka hosh aana zindagi ka dard-e-sar jaana

fana ka hosh aana zindagi ka dard-e-sar jaana
ajal kya hai khumar-e-baada-e-hasti utar jaana
azizan-e-watan ko ghuncha o barg o samar jaana
khuda ko baghban aur qaum ko hum ne shajar jaana
urus-e-jaan naya pairahan-e-hasti badalti hai
faqat tamhid aane ki hai duniya se guzar jaana
musibat mein bashar ke jauhar-e-mardana khulte hain
mubarak buz-dilon ko gardish-e-qismat se dar jaana
wo tab-e-yas-parwar ne mujhe chashm-e-aqidat di
ki sham-e-gham ki tariki ko bhi nur-e-sahar jaana
bahut sauda raha waiz tujhe nar-e-jahannam ka
maza soz-e-mohabbat ka bhi kuchh ai be-khabar jaana
karishma ye bhi hai ai be-khabar iflas-e-qaumi ka
talash-e-rizq mein ahl-e-hunar ka dar-ba-dar jaana
ajal ki nind mein bhi khwab-e-hasti gar nazar aaya
to phir bekar hai tang aa ke is duniya se mar jaana
wo sauda zindagi ka hai ki gham insan sahta hai
nahin to hai bahut aasan is jine se mar jaana
chaman-zar-e-mohabbbat mein usi ne baghbani ki
ki jis ne apni mehnat ko hi mehnat ka samar jaana
sidhaari manzil-e-hasti se kuchh be-e'tinai se
tan-e-khaki ko shayad ruh ne gard-e-safar jaana