watan ka rag

zamin hind ki rutba mein arsh-e-ala hai
ye home-rule ki ummid ka ujala hai
mrs-besant ne is aarzu ko pala hai
faqir qaum ke hain aur ye rag mala hai
talab fuzul hai kante ki phul ke badle
na len bahisht bhi hum home-rule ke badle
watan-parast shahidon ki khak laenge
hum apni aankh ka surma use banaenge
gharib man ke liye dard-dukh uthaenge
yahi payam-e-wafa qaum ko sunaenge
talab fuzul hai kante ki phul ke badle
na len bahisht bhi hum home-rule ke badle
hamare waste zanjir-o-tauq gahna hai
wafa ke shauq mein gandhi ne jis ko pahna hai
samajh liya ki hamein ranj-o-dard sahna hai
magar zaban se kahenge wahi jo kahna hai
talab fuzul hai kante ki phul ke badle
na len bahisht bhi hum home-rule ke badle
pahnane wale agar bediyan pahnaenge
khushi se qaid ke goshe ko hum basaenge
jo santari dar-e-zindan ke bhi so jaenge
ye rag ga ke unhen nind se jagaenge
talab fuzul hai kante ki phul ke badle
na len bahisht bhi hum home-rule ke badle
zaban ko band kiya hai ye ghafilon ko hai naz
zara ragon mein lahu ka bhi dekh len andaz
rahega jaan ke ham-rah dil ka soz-o-gudaz
chita se aaegi marne ke baad ye aawaz
talab fuzul hai kante ki phul ke badle
na len bahisht bhi hum home-rule ke badle
yahi dua hai watan ke shikasta haalon ki
yahi umang jawani ke naunihaalon ki
jo rahnuma hai mohabbat pe mitne walon ki
hamein qasam hai usi ke saped baalon ki
talab fuzul hai kante ki phul ke badle
na len bahisht bhi hum home-rule ke badle
yahi payam hai koyal ka bagh ke andar
isi hawa mein hai ganga ka zor aath-pahr
hilal-e-id ne di hai yahi dilon ko khabar
pukarta hai himala se abr uth uth kar
talab fuzul hai kante ki phul ke badle
na len bahisht bhi hum home-rule ke badle
base hue hain mohabbat se jin ki qaum ke ghar
watan ka pas hai un ko suhag se badh kar
jo shir-khar hain hindostan ke lakht-e-jigar
ye man ke dudh se likkha hai un ke sine par
talab fuzul hai kante ki phul ke badle
na len bahisht bhi hum home-rule ke badle

marsiya baal-ganga-dhar-tilak

maut ne raat ke parde mein kiya kaisa war
raushani-e-subh watan ki hai ki matam ka ghubar
marka sard hai soya hai watan ka sardar
tantana sher ka baqi nahin suna hai kachhaar
bekasi chhati hai taqdir phiri jati hai
qaum ke hath se talwar giri jati hai
uth gaya daulat-e-namus-e-watan ka waris
qaum marhum ke eazaz-e-kuhan ka waris
jaan-nisar-e-azali sher-e-deccan ka waris
peshwaon ke garajte hue ran ka waris
thi samai hui puna ki bahaar aankhon mein
aakhiri daur ka baqi tha khumar aankhon mein
maut mahrashtra ki thi ya teri marne ki khabar
murdani chha gai insan to kya patthar par
pattiyan jhuk gain murjha gae sahra ke shajar
rah gae josh mein bahte hue dariya tham kar
sard-o-shadab hawa ruk gai kohsaron ki
raushni ghat gai do-chaar ghadi taron ki
tha nigahban-e-watan dabadaba-e-am tera
na digen panw pe tha qaum ko paigham
dil raqibon ke larazte the ye tha kaam tera
nind se chaunk pade sun jo liya nam tera
yaad kar ke tujhe mazlum-e-watan roenge
banda-e-rasm-e-jafa chain se ab soenge
zindagi teri bahaar chamanistan-e-wafa
aabru tere liye qaum se paiman-e-wafa
aashiq-e-nam-e-watan kushta-e-arman-e-wafa
mard-e-maidan-e-wafa jism-e-wafa jaan-e-wafa
ho gai nazr-e-watan hasti-e-fani teri
na to piri rahi teri na jawani teri
auj-e-himmat pe raha teri wafa ka khurshed
maut ke khauf pe ghaalib rahi khidmat ki umed
ban gaya qaid ka farman bhi rahat ki nawed
hue tariki-e-zindan mein tere baal saped
phir raha hai meri nazron mein sarapa tera
aah-o-qaid-e-sitam aur budhapa tera
moajiza ashk-e-mohabbat ka dikhaya tu ne
ek qatra se ye tufan uthaya tu ne
mulk ko hasti-e-bedar banaya tu ne
jazba-e-qaum ko jadu ko jagaya tu ne
ek tadap aa gai sote hue armanon mein
bijliyan kaund gain qaum ke viranon mein
lash ko teri sanwaren na rafiqan-e-kuhan
ho jabin ke liye sandal ki jagah khak-e-watan
tar hua hai jo shahidon ke lahu se daman
den usi ka tujhe punjab ke mazlum kafan
shor-e-matam na ho jhankar ho zanjiron ki
chahiye qaum ke bhisham ko chita tiron ki

dard-e-dil

dard hai dil ke liye aur dil insan ke liye
tazgi barg-o-samar ki chamanistan ke liye
saz-e-ahang-e-junun tar-e-rag-e-jaan ke liye
be-khudi shauq ki be-sar-o-saman ke liye
kya kahun kaun hawa sar mein bhari rahti hai
be piye aath-pahr be-khabari rahti hai
na hun shair na wali hun na hun ejaz-e-bayan
bazm-e-qudrat mein hun taswir ki surat hairan
dil mein ek rang hai lafzon se jo hota hai ayan
lai ki muhtaj nahin hai meri fariyaad-o-fughan
shauq-e-shohrat hawas-e-garmi-e-bazar nahin
dil wo yusuf hai jise fikr-e-kharidar nahin
aur honge jinhen rahta hai muqaddar se gila
aur honge jinhen milta nahin mehnat ka sila
main ne jo ghaib ki sarkar se manga wo mila
jo aqida tha mere dil ka hilae na hila
kyun daraate hain abas gabru musalman mujh ko
kya mitaegi bhala gardish-e-dauran mujh ko
kya zamana pe khule be-khabari ka meri raaz
tair-e-fikr mein paida to ho itni parwaz
kyun tabiat ko na ho be-khudi-e-shauq pe naz
hazrat-e-abr ke qadmon pe hai ye farq-e-niyaz
fakhr hai mujh ko usi dar se sharaf pane ka
main sharabi hun usi rind ke maikhane ka
dil mera daulat-e-duniya ka talabgar nahin
ba-khuda khak-nashini se mujhe aar nahin
mast hun hubb-e-watan se koi mai-khwar nahin
mujh ko maghrib ki numaish se sarokar nahin
apne hi dil ka piyala piye madhosh hun main
jhuti pita nahin maghrib ki wo mai-nosh hun main
qaum ke dard se hun soz-e-wafa ki taswir
meri rag rag se hai paida tap-e-gham ki tasir
hai magar aaj nazar mein wo bahaar-e-dil-gir
kar diya dil ko farishton ne tarab ke taskhir
ye nasim-e-sahari aaj khabar lai hai
sal guzra mere gulshan mein bahaar aai hai
qaum mein aath baras se hai ye gulshan shadab
chehra-e-gul pe yahan pas-e-adab ki hai naqab
mere aaina-e-dil mein hai faqat is ka jawab
us ke kanton pe kiya main ne nisar apna shabab
kaam shabnam ka liya dida-e-tar se apne
main ne sincha hai use khun-e-jigar se apne
har baras rang pe aata hi gaya ye gulzar
phul tahzib ke khilte gae mitte gae khar
patti patti se hua rang-e-wafa ka izhaar
naujawanan-e-chaman ban gae taswir-e-bahaar
rang-e-gul dekh ke dil qaum ka diwana hua
jo tha bad-khwah-e-chaman sabza-e-begana hua
bu-e-nakhwat se nahin yan ke gulon ko sarokar
hai buzurgon ka adab in ki jawani ka singar
ilm-o-iman ki tarawat ka dilon mein hai guzar
dho gae chashma-e-akhlaq se sinon ke ghubar
rang dikhlati hai yun dil ki safa yaron mein
raushni subh ki jis tarah ho gulzaron mein
kis ko malum thi is gulshan-e-akhlaq ki rah
main ne phulon ko kiya rang-e-wafa se aagah
ab to is bagh pe hai sab ki mohabbat ki nigah
jo ki paude the shajar ho gae masha-allah
kya kahun rang-e-jawani mein jo is rag ke the
baghban ho gae gulchin jo mere bagh ke the
go ki baqi nahin kaifiyyat-e-tufan-e-shabab
phans ke janjal mein duniya ke ye qissa hua khwab
mast rahta hai magar ab bhi dil-e-khana-kharab
sham ko baith ke mahfil mein lundhata hun sharab
nashsha-e-ilm ki ummid pe jine wale
simat aate hain sar-e-sham se pine wale
aur hi rang pe hai aaj bahaar-e-gulshan
sair ke waste aae hain azizan-e-watan
farsh aankhen kiye baithe hain jawanan-e-chaman
dil mein tufan-e-tarab lab pe mohabbat ke sukhan
kaun hai aaj jo is bazm mein masrur nahin
ruh-e-sarshaar bhi khinch aae to kuchh dur nahin
magar afsos ye duniya hai maqam-e-ibrat
ranj ki yaad dilata hai khayal-e-rahat
aaj yaad aati hai un phulon ki mujh ko surat
khilte hi kar gae jo mere chaman se rehlat
chashm-e-bad-dur gulon ki ye bhari dali hai
chand phulon ki magar is mein jagah khali hai
ye wo gul the jinhen arbab-e-nazar ne roya
bhai ne bahnon ne madar ne pidar ne roya
khak rona tha jo is dida-e-tar ne roya
muddaton in ko mere qalb-o-jigar ne roya
dil ke kuchh dagh-e-mohabbat hain nishani un ki
bachpana dekh ke dekhi na jawani un ki
khair duniya mein kabhi soz hai aur kabhi hai saz
naunihaalan-e-chaman ki rahe ab umr daraaz
bhai se badh ke mujhe hain ye mere maya-naz
mere monis hain yahi aur yahi mere hamraaz
mar ke bhi ruh meri dil ki tarah shad rahe
main rahun ya na rahun ye chaman aabaad rahe

barsat

hai dilati yaad mai-noshi faza barsat ki
dil badha jati hai aa aa kar ghata barsat ki
bandh gai hai rahmat-e-haq se hawa barsat ki
nam khulne ka nahin leti ghata barsat ki
ug raha hai har taraf sabza dar-o-diwar par
intiha garmi ki hai aur ibtida barsat ki
dekhna sukhi hui shakhon mein bhi jaan aa gai
haq mein paudon ke masiha hai hawa barsat ki
hon sharik-e-bazm-e-mai zahid bhi tauba tod kar
jhumti qible se utthi hai ghata barsat ki
asl to ye hai mai-o-mashuq ka jab lutf hai
chandni ho raat ko din ko ghata barsat ki
wo papihon ki sadaen aur wo moron ka raqs
wo hawa-e-sarw aur kali ghata barsat ki
par utar jaenge bahr-e-gham se rind-e-baada-nosh
le udegi kashti-e-mai ko hawa barsat ki
khud-bakhud taza umangen josh par aane lagin
dil ko garmane lagi thandi hawa barsat ki
wo duaen mai-kashon ki aur wo lutf-e-intizar
hae kin nazon se chalti hai hawa barsat ki
main ye samjha abr ke rangin tukde dekh kar
takht pariyon ke ud lai hawa barsat ki
naz ho jis ko bahaar-e-misr-o-sham-o-rum par
sar-zamin-e-hind mein dekhe faza barsat ki

ramaen ka ek sin

rukhsat hua wo bap se le kar khuda ka nam
rah-e-wafa ki manzil-e-awwal hui tamam
manzur tha jo man ki ziyarat ka intizam
daman se ashk ponchh ke dil se kiya kalam
izhaar-e-be-kasi se sitam hoga aur bhi
dekha hamein udas to gham hoga aur bhi
dil ko sambhaalta hua aakhir wo naunihaal
khamosh man ke pas gaya surat-e-khayal
dekha to ek dar mein hai baithi wo khasta-haal
sakta sa ho gaya hai ye hai shiddat-e-malal
tan mein lahu ka nam nahi zard rang hai
goya bashar nahi koi taswir-e-sang hai
kya jaane kis khayal mein gum thi wo be-gunah
nur-e-nazar ye dida-e-hasrat se ki nigah
jumbish hui labon ko bhari ek sard aah
li gosha-ha-e-chashm se ashkon ne rukh ki rah
chehre ka rang haalat-e-dil kholne laga
har mu-e-tan zaban ki tarah bolne laga
aakhir asir-e-yas ka qufl-e-dahan khula
afsana-e-shadaid-e-ranj-o-mehan khula
ek daftar-e-mazalim-e-charkh-e-kuhan khula
wa tha dahan-e-zakhm ki bab-e-sukhan khula
dard-e-dil-e-gharib jo sarf-e-bayan hua
khun-e-jigar ka rang sukhan se ayan hua
ro kar kaha khamosh khade kyun ho meri jaan
main jaanti hun jis liye aae ho tum yahan
sab ki khushi yahi hai to sahra ko ho rawan
lekin main apne munh se na hargiz kahungi han
kis tarah ban mein aaankhon ke tare ko bhej dun
jogi bana ke raj-dulare ko bhej dun
duniya ka ho gaya hai ye kaisa lahu sapid
andha kiye hue hai zar-o-mal ki umid
anjam kya ho koi nahi jaanta ye bhed
soche bashar to jism ho larzan misal-e-bid
likkhi hai kya hayat-e-abad in ke waste
phaila rahe hain jal ye kis din ke waste
leti kisi faqir ke ghar mein agar janam
hote na meri jaan ko saman ye baham
dasta na sanp ban ke mujhe shaukat-o-hasham
tum mere lal the mujhe kis saltanat se kam
main khush hun phunk de koi is takht-o-taj ko
tum hi nahi to aag laga dungi raj ko
kin kin riyazaton se guzare hain mah-o-sal
dekhi tumhaari shakl jab a mere naunihaal
pura hua jo byah ka arman tha kamal
aafat ye aai mujh pe hue jab safed baal
chhatti hun un se jog liya jin ke waste
kya sab kiya tha main ne isi din ke waste
aise bhi na-murad bahut aaenge nazar
ghar jin ke be-charagh rahe aah umr bhar
rahta mera bhi nakhl-e-tamanna jo be-samar
ye ja-e-sabr thi ki dua mein nahi asar
lekin yahan to ban ke muqaddar bigad gaya
phal phul la ke bagh-e-tamanna ujad gaya
sarzad hue the mujh se khuda jaane kya gunah
manjdhaar mein jo yun meri kashti hui tabah
aati nazar nahi koi amn-o-aman ki rah
ab yan se kuch ho to adam mein mile panah
taqsir meri khaliq-e-alam bahal kare
aasan mujh gharib ki mushkil ajal kare
sun kar zaban se man ki ye fariyaad-e-dard-khez
us khasta-jaan ke dil pe chali gham ki tegh-e-tez
aalam ye tha qarib ki aanhken hon ashk-rez
lekin hazar zabt se rone se ki gurez
socha yahi ki jaan se bekas guzar na jae
nashad hum ko dekh ke man aur mar na jae
phir arz ki ye madar-e-nashad ke huzur
mayus kyun hain aap alam ka hai kyun wafur
sadma ye shaq aalam-e-piri mein hai zarur
lekin na dil se kijiye sabr-o-qarar dur
shayad khizan se shakl ayan ho bahaar ki
kuchh maslahat isi mein ho parwardigar ki
ye jal ye fareb ye sazish ye shor-o-shar
hona jo hai sab us ke bahane hain sar-ba-sar
asbab-e-zahiri mein na in par karo nazar
kya jaane kya hai parda-e-qudrat mein jalwa-gar
khas us ki maslahat koi pahchanta nahi
manzur kya use hai koi jaanta nahi
rahat ho ya ki ranj khushi ho ki intishaar
wajib har ek rang mein hai shukr-e-kird-gar
tum hi nahi ho kushta-e-nairang-e-rozgar
matam-kade mein dahr ke lakhon hain sogwar
sakhti sahi nahi ki uthai kadi nahi
duniya mein kya kisi pe musibat padi nahi
dekhe hain is se badh ke zamane ne inqalab
jin se ki be-gunahon ki umren huin kharab
soz-e-darun se qalb o jigar ho gae kabab
piri miti kisi ki kisi ka mita shabab
kuchh ban nahi pada jo nasibe bigad gae
wo bijliyan girin ki bhare ghar ujad gae
man bap munh hi dekhte the jin ka har ghadi
qaem thin jin ke dam se umiden badi badi
daman pe jin ke gard bhi ud kar nahi padi
mari na jin ko khwab mein bhi phul ki chhadi
mahrum jab wo gul hue rang-e-hayat se
un ko jala ke khak kiya apne hat se
kahte the log dekh ke man bap ka malal
in be-kason ki jaan ka bachna hai ab muhaal
hai kibriya ki shan guzarte hi mah-o-sal
khud dil se dard-e-hijr ka mitta gaya khayal
han kuchh dinon to nauha-o-matam hua kiya
aakhir ko ro ke baith rahe aur kya kiya
padta hai jis gharib pe ranj-o-mehan ka bar
karta hai us ko sabr ata aap kirdgar
mayus ho ke hote hain insan gunahgar
ye jaante nahi wo hai dana-e-rozgar
insan us ki rah mein sabit-qadam rahe
gardan wahi hai amr-e-raza mein jo kham rahe
aur aap ko to kuchh bhi nahi ranj ka maqam
baad-e-safar watan mein hum aaenge shad-kaam
hote hain baat karne mein chaudah baras tamam
qaem umid hi se hai duniya hai jis ka nam
aur yun kahin bhi ranj-o-bala se mafar nahi
kya hoga do ghadi mein kisi ko khabar nahi
akasr riyaz karte hain phulon pe baghban
hai din ki dhup raat ki shabnam unhen giran
lekin jo rang bagh badalta hai na-gahan
wo gul hazar pardon mein jate hain raegan
rakhte hain jo aziz unhen apni jaan ki tarah
milte hain dast-e-yas wo barg-e-khizan ki tarah
lekin jo phul khilte hain sahra mein be-shumar
mauquf kuchh riyaz pe un ki nahi bahaar
dekho ye qudarat-e-chaman-ara-e-rozgar
wo abr-o-baad o barf mein rahte hain barqarar
hota hai un pe fazl jo rabb-e-karim ka
mauj-e-sumum banti hai jhonka nasim ka
apni nigah hai karam-e-karsaz par
sahra chaman banega wo hai mehrban agar
jangal ho ya pahad safar ho ki ho hazar
rahta nahi wo haal se bande ke be-khabar
us ka karam sharik agar hai to gham nahi
daman-e-dasht daman-e-madar se kam nahi

marsiya gopal krishn gokhle

laraz raha tha watan jis khayal ke dar se
wo aaj khun rulata hai dida-e-tar se
sada ye aati hai phal phul aur patthar se
zamin pe taj gira qaum-e-hind ke sar se
habib qaum ka duniya se yun rawana hua
zamin ulat gai kya munqalib zamana hua
badhi hui thi nahusat zawal-e-paiham ki
tere zuhur se taqdir qaum ki chamki
nigah-e-yas thi hindustan pe aalam ki
ajib shai thi magar raushni tere dam ki
tujhi ko mulk mein raushan dimagh samjhe the
tujhe gharib ke ghar ka charagh samjhe the
watan ko tu ne sanwara kis aab-o-tab ke sath
sahar ka nur badhe jaise aaftab ke sath
chune rifah ke gul husn-e-intikhab ke sath
shabab qaum ka chamka tere shabab ke sath
jo aaj nashw-o-numa ka naya zamana hai
ye inqalab teri umr ka fasana hai
raha mizaj mein sauda-e-qaum khu ho kar
watan ka ishq raha dil ki aarzu ho kar
badan mein jaan rahi waqf-e-abru ho kar
ragon mein josh-e-mohabbat rahe lahu ho ho kar
khuda ke hukm se jab aab-o-gil bana tera
kisi shahid ki mitti se dil bana tera
watan ki jaan pe kya kya tabahiyan aain
umand umand ke jihaalat ki badliyan aain
charagh-e-amn bujhane ko aandhiyan aain
dilon mein aag lagane ko bijliyan aain
is intishaar mein jis nur ka sahaara tha
ufuq pe qaum ke wo ek hi sitara tha
hadis-e-qaum bani thi teri zaban ke liye
zaban mili thi mohabbat ki dastan ke liye
khuda ne tujh ko payambar kiya yahan ke liye
ki tere hath mein naqus tha azan ke liye
watan ki khak teri bargah-e-ala hai
hamein yahi nai masjid naya shiwala hai
gharib hind ne tanha nahin ye dagh saha
watan se dur bhi tufan ranj-o-gham ka utha
habib kya hain harifon ne ye zaban se kaha
safir-e-qaum jigar-band-e-saltanat na raha
payam shah ne diya rasm-e-taziyat ke liye
ki tu sutun tha aiwan-e-saltanat ke liye
dilon mein naqsh hain ab tak teri zaban ke sukhan
hamari rah mein goya charagh hain raushan
faqir the jo tere dar ke khadman-e-watan
unhen nasib kahan hoga ab tera daman
tere alam mein wo is tarah jaan khote hain
ki jaise bap se chhut kar yatim rote hain
ajal ke dam mein aana hai yun to aalam ko
magar ye dil nahin tayyar tere matam ko
pahad kahte hain duniya mein aise hi gham ko
mita ke tujh ko ajal ne mita diya hum ko
janaza hind ka dar se tere nikalta hai
suhag qaum ka teri chita mein jalta hai
rahega ranj zamane mein yaadgar tera
wo kaun dil hai ki jis mein nahin mazar tera
jo kal raqib tha hai aaj sogwar tera
khuda ke samne hai mulk sharmsar tera
pali hai qaum tere saya-e-karam ke tale
hamein nasib thi jannat tere qadam ke tale