har haqiqat majaz ho jae

By

har haqiqat majaz ho jae
kafiron ki namaz ho jae
dil rahin-e-niyaz ho jae
bekasi karsaz ho jae
minnat-e-chaara-saz kaun kare
dard jab jaan-nawaz ho jae
ishq dil mein rahe to ruswa ho
lab pe aae to raaz ho jae
lutf ka intizar karta hun
jaur ta hadd-e-naz ho jae
umr be-sud kat rahi hai 'faiz'
kash ifsha-e-raaz ho jae

hamin se apni nawa ham-kalam hoti rahi

By

hamin se apni nawa ham-kalam hoti rahi
ye tegh apne lahu mein niyam hoti rahi
muqabil-e-saf-e-ada jise kiya aaghaz
wo jang apne hi dil mein tamam hoti rahi
koi masiha na ifa-e-ahd ko pahuncha
bahut talash pas-e-qatl-e-am hoti rahi
ye barhaman ka karam wo ata-e-shaikh-e-haram
kabhi hayat kabhi mai haram hoti rahi
jo kuchh bhi ban na pada 'faiz' lut ke yaron se
to rahzanon se dua-o-salam hoti rahi

hum sada hi aise the ki yun hi pazirai

By

hum sada hi aise the ki yun hi pazirai
jis bar khizan aai samjhe ki bahaar aai
aashob-e-nazar se ki hum ne chaman-arai
jo shai bhi nazar aai gul-rang nazar aai
ummid-e-talattuf mein ranjida rahe donon
tu aur teri mahfil main aur meri tanhai
yak jaan na ho sakiye anjaan na ban sakiye
yun tut gai dil mein shamshir-e-shanasai
us tan ki taraf dekho jo qatl-gah-e-dil hai
kya rakkha hai maqtal mein ai chashm-e-tamashai

hum musafir yunhi masruf-e-safar jaenge

By

hum musafir yunhi masruf-e-safar jaenge
be-nishan ho gae jab shahr to ghar jaenge
kis qadar hoga yahan mehr-o-wafa ka matam
hum teri yaad se jis roz utar jaenge
jauhari band kiye jate hain bazar-e-sukhan
hum kise bechne almas-o-guhar jaenge
nemat-e-zist ka ye qarz chukega kaise
lakh ghabra ke ye kahte rahen mar jaenge
shayad apna bhi koi bait hudi-khwan ban kar
sath jaega mere yar jidhar jaenge
'faiz' aate hain rah-e-ishq mein jo sakht maqam
aane walon se kaho hum to guzar jaenge

hairan hai jabin aaj kidhar sajda rawa hai

By

hairan hai jabin aaj kidhar sajda rawa hai
sar par hain khudawand sar-e-arsh khuda hai
kab tak ise sinchoge tamanna-e-samar mein
ye sabr ka pauda to na phula na phala hai
milta hai khiraj us ko teri nan-e-jawin se
har baadshah-e-waqt tere dar ka gada hai
har ek uqubat se hai talkhi mein sawa-tar
wo rang jo na-karda gunahon ki saza hai
ehsan liye kitne masiha-nafason ke
kya kijiye dil ka na jala hai na bujha hai

girani-e-shab-e-hijran do-chand kya karte

By

girani-e-shab-e-hijran do-chand kya karte
ilaj-e-dard tere dardmand kya karte
wahin lagi hai jo nazuk maqam the dil ke
ye farq dast-e-adu ke gazand kya karte
jagah jagah pe the naseh to ku-ba-ku dilbar
inhen pasand unhen na-pasand kya karte
hamin ne rok liya panja-e-junun warna
hamein asir ye kotah-kamand kya karte
jinhen khabar thi ki shart-e-nawa-gari kya hai
wo khush-nawa gila-e-qaid-o-band kya karte
gulu-e-ishq ko dar-o-rasan pahunch na sake
to laut aae tere sar-buland kya karte