balli-maran ke mohalle ki wo pechida dalilon ki si galiyan

By

balli-maran ke mohalle ki wo pechida dalilon ki si galiyan
samne tal ki nukkad pe bateron ke qaside
gudgudati hui pan ki pikon mein wo dad wo wah wa
chand darwazon pe latke hue bosida se kuchh tat ke parde
ek bakri ke mimyane ki aawaz
aur dhundlai hui sham ke be-nur andhere sae
aise diwaron se munh jod ke chalte hain yahan
chudi-walan kai katre ki badi-bi jaise
apni bujhti hui aankhon se darwaze tatole
isi be-nur andheri si gali-qasim se
ek tartib charaghon ki shurua hoti hai
ek quran-e-sukhan ka safha khulta hai
asadullah-khan-'ghaalib' ka pata milta hai

wo jo shaer tha

By

wo jo shaer tha, chup sa rahta tha
bahki bahki si baaten karta tha
aankhen kanon pe rakh ke sunta tha
gungi khamoshiyon ki aawazen!
jama karta tha chand ke sae
gili gili si nur ki bunden
ok mein bhar ke khadkhadata tha
rukhe rukhe se raat ke patte
waqt ke is ghanere jangal mein
kachche pakke se lamhe chunta tha
han, wahi, wo ajib sa shaer
raat ko uth ke kuhniyon ke bal
chand ki thodi chuma karta hai!!
chand se gir ke mar gaya hai wo
log kahte hain khud-kushi ki hai

wirasat

By

apni marzi se to mazhab bhi nahin us ne chuna tha
us ka mazhab tha jo man bap se hi us ne wirasat mein liya tha
apne man bap chune koi ye mumkin hi kahan hai?
us pe ye mulk bhi lazim tha ki man bap ka ghar tha is mein
ye watan us ka chunaw to nahin tha
wo to kal nau hi baras ka tha, use kyun chun kar
firqa-warana fasadat ne kal qatl kiya!

waqt-2

By

waqt ki aankh pe patti bandh ke khel rahe the aankh-micholi
raat aur din aur chand aur main
jaane kaise kaenat mein atka panw
dur gira ja kar main jaise
raushni se dhakka kha ke, parchhain zamin par girti hai!
dhayya chhune se pahle hi
waqt ne chor kaha aur aankhen khol ke mujh ko pakad liya!!

waqt-1

By

main udte hue panchhiyon ko daraata hua
kuchalta hua, ghas ki kalghiyan
giraata hua gardanen in darakhton ki, chhupta hua
jin ke pichhe se
nikla chala ja raha tha wo suraj
taaqub mein tha us ke main!
giraftar karne gaya tha use
jo le ke meri umr ka ek din bhagta ja raha tha!

urdu zaban

By

ye kaisa ishq hai urdu zaban ka,
maza ghulta hai lafzon ka zaban par
ki jaise pan mein mahnga qimam ghulta hai
ye kaisa ishq hai urdu zaban ka
nasha aata hai urdu bolne mein
gilauri ki tarah hain munh lagi sab istelahen
lutf deti hai, halaq chhuti hai urdu to, halaq se jaise mai ka ghont utarta hai
badi aristocracy hai zaban mein
faqiri mein nawabi ka maza deti hai urdu
agarche mani kam hote hai urdu mein
alfaz ki ifraat hoti hai
magar phir bhi, buland aawaz padhiye to bahut hi mo'tabar lagti hain baaten
kahin kuchh dur se kanon mein padti hai agar urdu
to lagta hai ki din jadon ke hain khidki khuli hai, dhup andar aa rahi hai
ajab hai ye zaban, urdu
kabhi kahin safar karte agar koi musafir sher padh de 'mir', 'ghaalib' ka
wo chahe ajnabi ho, yahi lagta hai wo mere watan ka hai
badi shaista lahje mein kisi se urdu sun kar
kya nahin lagta ki ek tahzib ki aawaz hai, urdu